Búginde Jolaman Esetovpen qaztalovtyqtar «kúnde júzdesedi». Nege deısizder ǵoı? Aýdanymyzdyń aýyldaryndaǵy kóshelerde ilinip turǵan barlyq bannerler onyń qolynan shyqqan.
Sonymen qatar túrli býkletter de Jolamannyń qolymen jasalyp jatyr. Osylardy eskersek, zamandasymyzben aýdan turǵyndary kúnde júzdesip turǵan joq pa?! О́ıtkeni ol – aýdanymyzdaǵy eń alǵashqy polıgrafııa kásibimen aınalysyp otyrǵan birden-bir jas kásipker. Osyndaı eńbeginiń nátıjesinde osydan 2 jyl buryn oblystyq «Úzdik jas kásipker» atalymynyń jeńimpazy atandy.
Endi Jolaman taǵy bir qyrynan kórinýde. Jastaıynan jylqy malyn qadir tutqan ol sáıgúlik baptap, báıge attaryn jaratady. Jolamannyń júırikteri alaman báıgelerde top jaryp ta júr. Osyndaı kásibin ózi ǵana bilip qoımaı, jasóspirimderge úıretýdi qolǵa aldy. Baptaýyndaǵy 7 sáıgúlikpen (aǵylshyn, qoltýma tuqymdar) mektep oqýshylaryna úıretý úshin tegin úıirme ashty. Jylqy dese qandary qozatyn qazaqtyń balalary emes pe? Úıirmege úıirilip qaradomalaqtar kóptep kele bastady. Olardyń ishinde tipti qyz bala da bar. Búginde sol balalar bos ýaqyttarynda Jolamannyń qasynan tabylýda. Olar atqa minip úırenýmen qatar báıgege shabý, teńge alý, qyz qýý, jamby atý syndy ulttyq oıyndardy da úırenýde. Jolaman olarǵa jylqy tarıhy týraly dáris te oqyp júr.
Biz barǵanda qaradomalaqtar atqa minip, máz bolyp júr eken. Olardy áńgimege tartyp edik. «Atqa minsek báıgege shapqymyz keledi» dedi. Mine, olardyń boıynda ulttyq rýh oıanyp keledi. Osyndaıda «Qazaq tarıhyn aıtsaq jylqy tarıhyn aıtamyz, jylqy tarıhyn aıtsaq qazaq tarıhyn aıtamyz» degen danalyq sóz oıǵa oralady.
– Aldaǵy ýaqytta taı jarys uıymdastyramyn. Sonymen qatar túrli ulttyq at sporty oıyndaryn da ótkizý josparymda bar, – dedi Jolaman. Mine, osyndaı ulttyq qadir-qasıetimizdi ulyqtaıtyn, ony jasóspirimderge úıretip júrgen isin baıqaǵan, árkez jańashyldyq bastamalarǵa qoldaý kórsetetin aýdan ákimi Abat Abaıuly Jolamanǵa jańadan qurylyp jatqan «Aıbyn» sport klýby arqyly úıirme ashýǵa qoldaý kórsetetinin bildirgen.
Sondyqtan aldaǵy ýaqytta aýdanymyzda qasıetti janýar jylqy malyn dáripteıtin «Jolaman mektebi» qalyptassa degen tilek bar.
Móldir ÁNÝARBEKQYZY Batys Qazaqstan oblysy, Qaztalov aýdany