О́tken jyldyń sońǵy aıynda senator Darıǵa Nazarbaeva Premer-Mınıstr Baqytjan Saǵyntaevtyń atyna depýtattyq saýal joldap, elimizdegi eń úlken spýtnıktik telekompanııa – «OTAÝ TV»-ny jekemenshik «Saspio HD» kompanııasyna berý týraly sheshimdi kim shyǵarǵanyn jáne qandaı shartpen beriletinin bilgisi keletinin suraǵan.
О́ziniń saýalynda senator osy kúnge deıin memlekettik «Qazteleradıo» AQ menshigi bolyp kelgen «Otaý TV»-ny damytýǵa respýblıkalyq bıýdjetten 53,4 mlrd teńge bólingenin, 2016 jyldyń jeltoqsanyna deıingi merzimde elimizdiń 77,5 paıyz turǵyndaryn qamtyǵan 356 stansa salynǵanyn, abonementteriniń sany 1 mln-nan asqanyn jáne t.b. aıta kelip, endi sonyń bárin jekemenshikke berýdiń qanshalyqty tıimdiligi baryn suraǵan. Sonymen birge saýalda kompanııany jekemenshikke berýdiń kesirinen «Qazteleradıo» AQ boıynsha buryn aqy-pulsyz taratylyp kelgen 55 arnany kórsetpeýge týra keletinine de alańdaýshylyq bildirilgen.
Osy saýalǵa aıdyń basynda Premer-Mınıstr B.Saǵyntaevtyń atynan jaýap keldi. Onda «OTAÝ TV» arqyly «negizgi» jáne «tolyq» dep atalatyn eki túrli arnalar paketi spýtnıktik teleradıohabarlary taratylyp kelgeni aıtyla otyryp, sonyń ishinde «negizgi» paket arqyly otandyq 45 telearna men 17 radıoarnanyń habarlary turǵyndarymyzǵa respýblıkalyq bıýdjettiń esebinen tegin usynylyp kelgeni jetkizilgen. Al «tolyq» paket arqyly sheteldik 74 telearnanyń habarlaryn abonementter aqyly negizde tutynady eken.
Jaýapqa qaraǵanda máseleniń bári osyǵan kelip tireletin sııaqty. Osy arnalardyń habarlaryn taratý tıimdi emestigi anyqtalǵan, óıtkeni sheteldik kontentterdiń ónimderin satyp alý qymbatqa túsken. Osy úshin «Qazteleradıo» AQ «Otaý TV»-nyń aqyly spýtnıktik teleradıohabarlaryn syrttan kelgen operatormen birlesip taratýyn maqul kóripti. Jasalǵan saraptama boıynsha «Tv-Sommers» JShS-niń «Saspio HD» saýda markasy jeńimpaz bolyp tanylypty. 2017 jyldyń 30 qarashasynda «Qazteleradıo» AQ basqarmasynyń sheshimimen osy kompanııamen yntymaqtasý sharty jasalǵan. Bul kompanııanyń ıeleri qatarynda G.Nurbaev, E.Isabaev, T.Shákenov jáne «Modern Nomads Entertainment» atty AQ (onyń qojaıyndary kim ekendigi kórsetilmegen) atalady.
Sonymen birge jaýap «Saspio HD» abonementtik aqyny burynǵy deńgeıde ustaý úshin abonementterdiń spýtnıktik qabyldaǵyshtaryn aýystyrmaıtynyn, qosymsha jaraqtar almaıtynyn jáne qosymsha montajdyq jumystar júrgizbeıtinin aıtady.
Jaýapqa qaraǵanda «Otaý TV» jekemenshik fırmanyń menshigine tolyq berilmeıdi, jumys onymen birlese júrgiziledi.
Daıyndaǵan Jaqsybaı SAMRAT,
«Egemen Qazaqstan»