Búgin «Dáýlet» ulttyq tennıs ortalyǵynda Qazaqstan jáne Shveısarııa qurama komandalarynyń baspasóz máslıhaty bolyp ótti. Onda Shveısarııa quramasynyń kapıtany Severın Lıýtı men Qazaqstan kapıtany Dıas Dosqaraevtar sóz sóıledi. Jıynnyń basty taqyryby 2-4 aqpan aralyǵynda Astanada ótetin Devıs kýbogynyń 1/8 fınaldyq kezdesýi edi.
Aldymen sóz alǵan qonaqtar quramasynyń kapıtany boldy. Severın Lıýtı birden osy teke tirestiń favorıti Qazaqstan dep kesip aıtty.
- Bizdiń qurama komandany barlyǵy Federer men Vavrınka arqyly tanıdy. Biraq, bul joly Rodjer de, Stanıslas ta kele almady. О́zderińiz estip-kórip otyrsyzdar Rodjer Federer óziniń ǵumyryndaǵy 20-shy úlken týrnırin jeńdi. Kúni keshe ǵana «Aýstralıan oýpendi» utty. Al Stanıslav Vavrınka bolsa jaraqat alyp, jarytyp kortqa shyǵa almaı júr. Sondyqtan da, qazir bizdiń quramanyń eń myqty tenısshisi Iаrı Laksonnen degen jas jigit. Jalpy quramamyz jastardan jasaqtalyp, bolashaqqa jumys istepýge bet aldyq. Sebebi, Federer men Vavrınkalardyń jastary taqap qaldy. Olar 1-2 jylda tennıspen qosh aıtysady, sol kezde solardyń ornyn basatyn osy jastar. Biz sol baǵyttaǵy jumysty qazirden bastap otyrmyz. Sondyqtan da, osy teke tireste Qazaqstan favorıt degim keledi.
- Sizdiń aryq aıtyp, semiz shyǵatyn ádetińiz emes pe? Degenmen, kelesi kezeńge ótsek degen oıyńyz bar ǵoı. Qazaqstan quramasynan kimdi erekshelep aıtar edińiz.
- Árıne, utyla salý úshin kelgen joqpyz. Qaıta osyndaı jastardan jasaqtalǵan qurammen Qazaqstandy onyń alańynda jeńip ketsek, tamasha bolar edi. Bizdiń negizgi maqsatymyz da sol. Biraq, Mıhaıl Kýkýshkın sekildi tisqaqqan tennısshilerge bizdiń jastardyń tájirıbıesi jete qoımas. Al qalǵanyn kortta kóre jatarmyz.
Osydan soń, mıkrafon aldyna jaıǵasqan Dıas Dosqaraev óz oıyn aıta jóneldi.
- Qazaqstan osy oıynda jeńýi kerek dep aıtylyp jatyr. Alaıda, osy sózderdiń árqaısysy bizge salmaq túsiredi. Erteń jeńilip qalyp jatsaq, abyroısyzdyq bolady ǵoı dep qobaljıtyn kezderimiz de joq emes. Biraq, sportta senimdilik degen dúnıe bar. О́z oıynymyzdy kórsetip, pysyqtaǵan daıyndyǵymyzdy tolyq asha bilsek jeńiske jetýimiz kerek.
- Eger alǵashqy 2-3 kezdesýde jeńiske jetsek, bálkim Siz de jastarǵa kezek beretin shyǵarsyz.
- Iá qazir eki tájirıbıeli tennısshi Kýkýshkın men Nedovesov qasymda otyr. Olardan bólek jastardy da shaqyrdyq. Dmıtrıı Popkony qazir jastar qatarynan shyǵaryp tastadyq. Ol tájirıbıesi tolysqan tennısshi. Al ondaı múmkindik týyp jatsa kortqa Tımýr Habıbýllın, Dmıtrıı Evseev, Roman Hasanovtyń kez-kelgeni shyǵyp qalýy múmkin.
- Shveısarııaǵa qarsy oıynǵa qanshalyqty daıyndaldyńyzdar?
- AQShtaǵy Delraı Bıch degen keshende jattyǵý jumystaryn júrgizdik. Ol jaqta ulttyq qurama men jastar quramasyn da shaqyrdyq. 2 apta boıy tyńǵylyqty daıyndyq ótkizdik. Jalpy aıtqanda, biz Ulttyq qurama retinde jyl basynan beri turaqty kezdesip, 10 kúndeı jattyǵýlar júrgizip turamyz. Osy joly da tennısshiler oıynǵa deıin 10 kún buryn Astanaǵa tegis jınaldy. Endi tek, jankúıerlerdiń qoldaýymen Shveısarııany jeńý kerekpiz.
Ermuhamed Máýlen