«Nur Otan» partııasynyń Tóraǵasy Nursultan Nazarbaevtyń partııa Saıası keńesiniń keńeıtilgen otyrysynda elimizdegi basty saıası kúshtiń jumysyn jańǵyrtý jóninde naqty tapsyrma bergeni belgili. Soǵan oraı «Nur Otan» partııasy birqatar tyń bastamalardy tabysty júzege asyrýda. Olardyń qatarynda «Jas Otan» Jastar qanatynyń jumysyndaǵy oń ózgerister de bar.
Jalpy partııalyq jańǵyrý «Jas Otandaǵy» kúrdeli ózgeristermen bastaldy deýge tolyq negiz bar. Búginde atalǵan qurylym qalyptasqan basqarý júıesinen bas tartyp, jastar uıymyna saı erkin negizge kóshirildi. Sondaı-aq, «Nur Otan» partııasynyń ǵımaratynda jastardyń shyǵarmashylyǵyn shyńdaıtyn, oıyn tynyqtyryp, jańa jobanyń jaı-kúıin talqylaıtyn arnaıy oryn da paıda boldy.
Búgin jańǵyrý aıasynda qaıta jasaqtalǵan «Jas Otannyń» jańa keńsesiniń tusaýkeser rásimi ótti. Is-sharaǵa «Nur Otan» partııasy Tóraǵasynyń Birinshi orynbasary Muhtar Qul-Muhammed arnaıy qatysyp, «Jas Otannyń» tyń bastamalaryna sáttilik tiledi. Sondaı-aq, ol jasotandyqtardyń jańa jobalarynyń tabysty júzege asyrylýyna partııa tarapynan jan-jaqty qoldaý kórsetiletinin aıtty.
– Elbasy atap ótkendeı, «Jas Otan» barlyq jastar uıymdarynyń basyn qosyp, Qazaqstan jastary men barsha saıası ınnovasııalardyń uıytqysy bolýy kerek. Partııa Saıası keńesiniń keńeıtilgen otyrysynda Elbasy, partııa Tóraǵasy «Nur Otan» partııasymen qatar onyń Jastar qanatynyń da jumysyn jańǵyrtý jóninde naqty tapsyrmalar berdi. Sondyqtan bıyl jasotandyqtardyń aldynda asa mańyzdy synaq – «Jas Otannyń» IV sezin ótkizý mindeti tur. Bizdiń jastarymyz bul synaqtan súrinbeı ótip, ózderine júktelgen mindetterdi abyroımen atqaryp shyǵady dep esepteımin. О́ıtkeni, jastar bizdiń qoǵamnyń eń belsendi, armanshyl, órshil, ókilderi, – dedi Muhtar Qul-Muhammed.
Bul oń ózgerister men tyń bastamalar «Jas Otannyń» jastarǵa jaqyndyǵyn, jańa usynystarǵa ashyqtyǵyn, belsendi jandarǵa qoldaý kórsetýge qashanda daıyn ekendigin jáne elimiz ben álemde bolǵan oqıǵalardy árdaıym oı eleginen ótkizip, jańalyqtar men jańǵyrýlarǵa beıimdigin aıqyn kórsetedi.