1991 jyly Atyraý qalasynda aǵylshyn tilin tereńdetip oqytatyn mamandandyrylǵan mekteptiń irgetasy qalandy. 1996 jyly mektep tehnıkalyq gımnazııa bolyp qaıta quryldy. Búginde munaıly aımaqtaǵy ozyq oıly órender bilim alatyn gımnazııa sondyqtan da óz tarıhyn táýelsizdikpen baılanystyrady. Munaıly óńirde shet tilin jetik biletin jergilikti mamandarǵa suranystyń joǵary bolýy osy gımnazııanyń ashylýyna túrtki bolǵan edi. 26 jyl ishinde bilim ordasynan myńdaǵan shákirt túlep ushty. Qazir olar shetelderde de bilim alyp, eńbek etip júr. Birinshi synyptan aǵylshyn tilin, jetinshi synyptan matematıkany tereńdetip oqytatyn gımnazııa – elimizdegi irgeli bilim oshaqtarynyń biri.
Mektepke barǵan sátte «Kitap oqý kúni» sharasynyń kýási boldyq. О́ńirlik «Rýhanı jańǵyrý» jobalyq keńsesi uıymdastyrǵan flesh-mob oblystaǵy barlyq mektepterde ótti. Tehnıkalyq gımnazııa shákirtteri de oqyǵan kitaptary jaıly oılarymen bólisip jatyr eken. «Adamzattyń negizgi qundy ıgilikteriniń biri – kitap. Ár oqyǵan kitaptan bilim jınalady, tanym kókjıegin keńitip, ómirge degen kózqarasymnyń qalyptasýy úshin kitaptyń mańyzdy ekenin bilemin. «Kitap oqý kúninde» jaqynda ǵana oqyp bitirgen Tahaýı Ahtanovtyń «Shyraǵyń sónbesin» romany jaıly aıttym», deıdi 9-synyp oqýshysy Aıaýlym Latıeva. Al gımnazııa kitaphanashysy Irına Ýhova osy sharada belsendilik tanytqandar oblystyq jas kitapqumar oqýshylar qoǵamdastyǵyna múshe bolatynyn aıtty. «Balalar kitap oqymaıdy deı almaımyn, – deıdi ol. – 4,5,6-synyp oqýshylarynyń kitaphanaǵa kelý belsendiligi joǵary. Onynshy synyp oqýshylary da bos ýaqyttarynda kitap oqıdy. Áńgimelesýden ańǵarǵanym, 8,9-synyptaǵylar kerek maǵlumatty ınternetten alǵan tıimdi dep sanaıdy eken. Balalardy kitaphanaǵa tartý maqsatynda «Jyldyń úzdik oqyrmany», «Eń kóp kitap oqyǵan synyp» degen baıqaýlar uıymdastyramyz».
Muǵalim mereıiAǵylshyn tilin tereńdetip oqytatyn tehnıkalyq gımnazııa dırektory, «Qurmet» ordeniniń ıegeri Sofııa Alıbaeva «Bilim ordasynyń basty maqsaty – bilim berý deńgeıiniń sapasyn kóterýde oqytýdyń jańa ınnovasııalyq tehnologııalyq izdenisin engizý, sol arqyly sanaly, rýhy bıik urpaq tárbıeleý», deıdi. Qazir ujymda 105 muǵalim bar, onyń 45-i joǵary sanatty. Eki myńnan astam oqýshy bilim alyp jatyr. Bıylǵy oqý jylynyń basty jańalyǵy – gımnazııa jańa ǵımaratqa kóshti. Buǵan deıin burynǵy balabaqshanyń ornynda oqyp kelgen edi. «Teńizshevroıl» kompanııasynyń «Igilik» baǵdarlamasy aıasynda «Nursaıa» shaǵyn aýdanynda keń de jaıly ǵımaratqa ornalasqan bilim oshaǵynda sapaly bilim alý úshin qajet jaǵdaıdyń bári bar.
«Gımnazııanyń materıaldyq bazasyn nyǵaıtýda oblys basshysy Nurlan Noǵaev árkez qoldaý kórsetip otyrady. «NKOK», «TShO» kompanııalarynyń kómegi de zor. Bizdiń basty maqtanyshymyz, jetistigimiz – shákirtterimiz. Ár salada elimizdiń ósip-órkendeýine óz úlesterin qosyp júrgen shákirtterimizdi úlgi etemiz».
«Saýat ashý» «Álippedeı» bolmaı tur– «Egemen Qazaqstan» gazetiniń bilim, tárbıe, tálim taqyryptaryn nazardan tys qaldyrmaı júrgeni qýantady, – deıdi gımnazııanyń joǵary sanatty muǵalimi Elmıra Esmuqanova. – Elimizdiń túkpir-túkpirindegi áriptesterimizdiń jańartylǵan bilim berý júıesi jaıyndaǵy oı-pikirlerin de basylym betinen oqyp júrmiz. Meniń aıtaıyn degenim – jańa baǵdarlama týraly. Jetistigi jazylyp ta, aıtylyp ta júr. Bul baǵdarlamada balalardyń til baılyǵyn damytýǵa basymdyq berilgen. Gımnazııada segiz birinshi synyp bar. Qıyndyǵy – barlyq balanyń deńgeıi, qabyldaýy birdeı emes.
Úndemeı otyryp sóıleıtin de balalar bar. Al baǵdarlama talaby kóbine balany sóıletýge negizdelgen. Bul ońaı emes. Ár balanyń tabıǵaty, damý deńgeıi ártúrli. Bilgenin kórsete almaıtyn oqýshylar da bar. «Saýat ashýdy» mysalǵa alsaq, balalarǵa kúrdeli tapsyrmalar, termınder berilgen. Mınıstrlik bekitkesin, muǵalimder oqytyp otyr, alaıda kitaptyń ishinde kerek te, kerek emes te málimetter baryn aıtqym keledi. Balanyń jas ereksheligine saı emes maǵlumattar bar. «Saýat ashýda» da, matematıkada da jazýdan góri aýyzsha tapsyrmalarǵa kóp kóńil bólingen».
Táýelsizdiktiń tekti urpaqtaryn tárbıeleý jolynda aıanbaı qyzmet etip júrgen ustazdardyń eńbegi qandaı qurmetke de laıyq. Sol mártebege laıyqtardyń qatarynda Atyraý qalasyndaǵy aǵylshyn tilin tereńdetip oqytatyn tehnıkalyq gımnazııanyń muǵalimderi de bar ekeni kóńilge qýanysh uıalatady. Ustaz úshin shákirt jetistiginen qymbat ne bar? Jaqynda respýblıkalyq olımpıadanyń ekinshi kezeńinen komandalyq esep boıynsha birinshi oryndy jeńip alǵan gımnazııanyń ár shákirti ónegeli. О́ıtkeni olar táýelsizdikpen birge bilim aıdynyna jol tartqan bilim kemesiniń órenderi.
Baqytgúl BABASh, «Egemen Qazaqstan»
ATYRAÝ