Aqmola oblysynda balyq aýlaý sporttyq saıysynyń tanymaldylyǵy artyp keledi. Tabıǵat aıasynda uıymdastyrylatyn osyndaı básekege qatysýshylar qatary da jyl sanap kóbeıe túsken. Jıyrma áýesqoı balyqshy qatysqan osyndaı jarystyń biri jaqynda Bulandy aýdanynda ótti.
Osyndaı ıgi sharalardy uıymdastyrý arqyly salamatty ómir saltyn ustanýdy jáne qorshaǵan ortany qorǵaýdy úıretýge bolatynyn keıbireýler qaperge ala bermeıdi. Sondaı-aq atalǵan saıystardy ótkizý arqyly kásipqoılyq jáne sporttyq balyq ustaý mashyqtaryn jetildirý maqsaty da alǵa qoıylǵan. Bulandy aýdandyq dene shynyqtyrý jáne sport bólimi Qaraózek aýyldyq okrýginde sporttyq balyq aýlaýdan jarys ótkizýi de sondyqtan.
Sporttyq jarys ótkizý arqyly qatysýshylardyń tabıǵat bergen rızyqty ózderi taýyp jeýine, shúıirkelesip bir-birimen pikir almasýyna múmkindik beredi. Kól betinen qazylǵan oıyqtar balyq aýlaýmen qatar sol balyqtarǵa aýadaı qajet sýdyń quramyn ottegimen qunarlandyrý úshin de jasalatyndyǵyn erekshe ataǵan jón. Kánigi balyqshylar jaqsy aýlanatyn jerlerdi aıtpaı tanıtyndyǵy qaperge alynyp, olardyń arasynda jerebe tastaldy. Áıtse de olarǵa eki qarmaqpen aýlaýǵa, qansha ilmek ilse de oǵan shekteý qoıylmady. Árbir qatysýshynyń balyqty aýlaýdaǵy san alýan tásilderine de ruqsat etildi. Nátıjesinde Kapıtonovka aýylynyń komandasy kóp balyq aýlap, chempıon atandy. Al Makınsk qalasynyń balyqshylary ekinshi tuǵyrdan kórindi. Jergilikti Qaraózek aýyldyq okrýginiń sportshylary úshinshi oryndy qanaǵat tutty.
Asqar TURAPBAIULY, «Egemen Qazaqstan»
Aqmola oblysy