Koreı Halyq Demokratııalyq Respýblıkasynyń (KHDR) Ońtústik Koreıadaǵy qysqy Olımpıadaǵa qatysýy osy jyldyń basyndaǵy qyzyqty oqıǵalardyń biri bolǵany anyq.
Qysqy Oıyndarǵa qatysqany úshin Ońtústik Koreıa kórshiles Soltústikke salǵan sanksııalaryn jumsartýyna týra kelgeni belgili boldy. Keri jaǵdaıda soltústikkoreıalyq delegasııa Phenchhanǵa jetýi ekitalaı bolar edi.
Soltústik Koreıa ókilderi Ońtústikke keme arqyly jetti. Onyń bortynda mýzykanttar, bıshiler bar. Seýl osy tusta KHDR-ǵa salǵan sanksııalarynan bas tartýyna týra keledi. KHDR tarapy delegasııa músheleri mingen kemesi jetkennen keıin ony Ońtústik Koreıa janarmaımen qamtamasyz etýge mindetti ekenin habarlady (biraq Seýl ázirge eshqandaı sheshim qabyldamady). The New York Times málimeti boıynsha bul halyqaralyq sanksııanyń tártibine qaıshy keledi.
Associated Press-tiń habarlaýynsha Ońtústik tarapy sanksııany osyǵan deıin de jeńildetken eken. 31 qańtar kúni KHDR-da ótken shańǵyshylar jarysyna Ońtústik Koreıa sportshylary attanǵan. Al Amerıka salǵan sanksııa boıynsha Soltústik Koreıaǵa barǵan kez kelgen ushaq jarty jyl boıy AQSh-qa qatynaı almaıdy. Alaıda Seýl ókilderi Vashıngtonmen kelisip, shańǵyshylardy KHDR-ǵa jetkizgen Asiana Air kompanııasynan bul qıyndyqty alyp tastady.
The New York Times soltústikkoreıalyqtardyń sporttyq jabdyqtarynda da qıyndyqtar baryn habarlady. О́tken jyly Jańa Zelandııada hokkeıden ótken týrnırge KHDR quramasy aıdynǵa aǵash taıaqtarymen shyqpaq bolǵan. Al qazirgi hokkeıshiler mundaı quraldardy sonaý 1990 jyldary qoldanystan alyp tastaǵan. Týrnır uıymdastyrýshylary sol kezde soltústikkoreıalyqtardy kómirtekti plastıkten jasalǵan túrimen qamtamasyz etken. Biraq KHDR hokkeıshileri ony óz elderine alyp kete almapty. Sebebi, Soltústik Koreıaǵa sándi taýarlardy kirgizýge bolmaıdy.
Bıylǵy Olımpıadaǵa KHDR-dyń hokkeı komandasy qatyspaıdy. Degenmen áıelder arasyndaǵy hokkeıge Ońtústik pen Soltústik Koreıa sportshylary birge shyǵatynyn umytpaǵan jón. Soltústik hokkeıshileri bul joly da jańa taıaqpen qamtamasyz etiledi. Biraq jarys aıaqtalysymen birden qaıtarylady. Al sport kıimderin Olımpıada demeýshisi Nike emes Lahta kompanııasy jetkizetin boldy. Nike basshylyǵy soltústikkoreıalyqtardy kıimdermen qamtamasyz etkeni úshin Amerıkanyń sanksııalarynan seskengen. Olardyń baǵyna oraı KHDR sportshylary da amerıkalyq kompanııanyń kıimderinen bas tartty.
Soltústik sportshylary úshin bir ókinishtisi hokkeı taıaqtaryn ǵana emes Olımpıada demeýshisi Samsung-tiń syılyqtaryn da alyp kete almaıdy. Ońtústikkoreıalyq kompanııa sportshylardyń bárine Samsung Galaxy Note 8 qurylǵysyn syılyq retinde tartý etedi.
Olımpıada ýaqytyndaǵy sanksııalar tek Soltústik Koreıanyń sportshylaryna ǵana emes sheneýnikterine de júrmeıdi. Seýl tarapy mundaı qadam Phenchhanmen aradaǵy shıelenistiń jeńildeýine ákeledi dep túsindirdi.
Daıyndaǵan
Aıan ÁBDÝÁLI, "Egemen Qazaqstan"