Elbasymyz óziniń «Bolashaqqa baǵdar: rýhanı jańǵyrý» baǵdarlamalyq maqalasynda tabysty bolýdyń basty faktory bilim ekenine nazar aýdarady. «Jastarymyz basymdyq beretin mejelerdiń qatarynda bilim árdaıym birinshi orynda turýy shart. Sebebi qundylyqtar júıesinde bilimdi bárinen bıik qoıatyn ult qana tabysqa jetedi», dep atap ótedi Memleket basshysy.
Elimizdiń bilim týraly zańnamalaryna sáıkes, muǵalim memlekettik ólshem deńgeıinen tómen bolmaıtyn bilim berýi tıis. Al jaqsy nátıjege jetý úshin ustaz oqytýdyń belgilengen tehnologııasyn ıgerip, ony sabaq barysynda paıdalanýy qajet. Osyǵan baılanysty bizdiń mektebimizde oqýshylarǵa bilim berýdiń tıisti tehnologııalary jasalyp, olar tájirıbege engizilýde. Mysaly, tarıh pánin alaıyq.
Jalpy bilim beretin mektepterde tarıh pánin oqytýdaǵy negizgi máseleniń biri – oqýshylardyń bilimdi óz betinshe ıgerýi. Bul jerde muǵalimniń sabaq ótkizýdiń úlgisin quryp, ony jetildirýdiń joldaryn tabýy erekshe ról atqarady. О́z kezeginde ol oqýshylardyń belgili bir tarıhı oqıǵany nemese tarıhı tulǵany tanyp-bilýge degen yntasyn, oılaý qabiletterin arttyrady. Sonymen qatar olardyń tanymdyq belsendiligi men izdenýshilik qasıetterin qalyptastyrýǵa negiz qalaıdy.
Bizdiń aýdanda kóneden syr shertetin tarıhı oryndar men kezinde eren eńbeginiń arqasynda kópshilikke úlgi bolǵan aǵalarymyz, ata-ájelerimiz barshylyq. Solardy oqýshylar nazaryna usynyp, ıgi isterinen habardar etý ustaz-muǵalimderdiń mindeti desek, qatelese qoımaspyz. О́ıtkeni óz týǵan ólkeńniń tarıhyn bilý kez kelgen azamattyń boryshy dep bilemiz.
Aýdan aýmaǵynda kúlli álemge belgili Sharyn shatqaly bar. Tarıhy áriden bastalatyn osy eskertkishti kórýge, ony tamashalaýǵa arnaıy keletin týrıster qatary jyl ótken saıyn kóbeıe túsýde. Onyń tarıhyn bizdiń mekteptiń muǵalimderi men oqýshylary jaqsy biledi. Sebebi mektep basshylyǵy oqýshylardy Sharyn shatqalyna ekskýrsııaǵa turaqty aparýǵa barlyq jaǵdaıdy jasap otyrady. Onyń ústine mektep oqýshylaryna Sharyn shatqalymen qatar, ózge de jer ataýlarynyń tarıhyna qatysty qosymsha sabaqtar ótkiziledi. Ondaǵy maqsat – shákirtterge óz týǵan ólkesiniń keshegi jáne búgingi tarıhynan habardar etý.
Kezinde osy aýylda ómirge kelip, elimizdiń órkendeýine eleýli úles qosqan ata-ájelerimizdiń ómir jolyn, eńbek jolyn oqýshylar nazaryna usyný tájirıbesi mektebimizdiń oqý baǵdarlamasyna engizilgen. Mysaly, bıylǵy oqý jylynyń birinshi jartysynda soǵys jáne eńbek ardageri Zamanbek Battalhanovtyń, sondaı-aq Halyq qaharmany Mórdin Taıypovtyń ómir jolyna arnalǵan is-sharalar uıymdastyryldy. Osyndaı is-sharalardyń jasóspirimderdi adaldyqqa, eńbekqorlyqqa, batyldyqqa tárbıeleýde orny erekshe bólek ekeni daýsyz.
Elbasymyzdyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýyndaǵy «О́ziniń tarıhyn, tilin, mádenıetin biletin, sondaı-aq zamanyna laıyq, shet tilderin meńgergen, ozyq ári jahandyq kózqarasy bar qazaqstandyq bizdiń qoǵamymyzdyń ıdealyna aınalýy tıis» degen sózi elimizdegi bilim berý mekemelerinde isteıtin jandardy jigerlendirip, alǵa qoıǵan mindetterdi iske asyrýǵa jumyldyrady degen senimdemiz. Árıne olardyń ishinde Úlken dıhan mektebiniń ujymy da bar.
Gúlbaqyt IGISINOVA, Úlken dıhan orta mektebi tarıh pániniń muǵalimi Almaty oblysy, Uıǵyr aýdany