Astana qalasynyń 20 jyldyǵy men Qyzylorda qalasynyń 200 jyldyǵyna oraı Syr óńirinde respýblıkalyq aıtys ótti. Qazaqstannyń 9 qalasynan aqyndar kelip, «Astana – bıik tórim, Qyzylorda – týǵan jerim!» taqyrybyn arqaý etip, dodaǵa tústi.
Aıtystyń ashylý saltanatyna oblys ákimi qatysyp, aqyndarǵa sáttilik tiledi.
«Edilden aıyrylǵan qazaq Esilden de aıyrylardaı bolyp turǵan eleń-alań kezeńde Elbasynyń batyldyǵymen, kemeńger sheshimimen Eýrazııa tórinde, Saryarqanyń tósinde zamanaýı Astana boı kóterdi. Elordany Almatydan Aqmolaǵa aýystyrý - bul qazaqtyń óz bıligi óz qolyna tıgen soń ulttyń bolmys-bitimin saqtap, bolashaǵyn baıandy etý maqsatynda «on oılanyp, toǵyz tolǵanyp» baryp, qabyldanǵan tarıhı sheshim boldy. Myńjyldyqtar toǵysyndaǵy mundaı batyl qadam qazir qaı qyrynan alyp qarasaq ta durystyǵyn ýaqyt dáleldedi. Qula daladan qubylaǵa bet túzegen, sáni men saltanaty jarasqan, sáýleti talaılardy tamsandyrǵan Elordamyz - Táýelsizdigimizdiń tiregine, ekonomıkamyzdyń júregine, álem elderi bas qosatyn dostyq mekenine aınaldy. Ata-babanyń attyń jalynda, túıeniń qomynda júrip qorǵaǵan keń baıtaq jerimizdi saqtap qalýdaǵy Elbasy Nursultan Ábishuly Nazarbaevtyń erligin qazaq qoǵamy endi ǵana túsine bastaǵandaı», - dedi aımaq basshysy.
Sharaǵa arnaıy Mańǵystaýdan kelgen aqyn Mels Qosymbaev Syr eline arnaýyn aıtty.
Búgingi baıqaýǵa Astana, Almaty, Aqtóbe, Taraz, Atyraý, Qaraǵandy, Semeı, Pavlodar jáne Qyzylorda oblysynyń ataqty aıtys sheberleri qatysty.
Bas júldeni qyzylordalyq aqyn Meıirbek Sultanhan jeńip aldy. Birinshi oryn qaraǵandylyq Maqsat Aqanovqa buıyrsa, almatylyq Rústem Qaıyrtaı ekinshi oryn ıelendi. Sondaı-aq, semeılik Ásem Erejeqyzy, pavlodarlyq Qaırat Nurqanat jáne jerlesimiz Muhtar Nııazov úshinshi oryn aldy. Qalǵan qatysýshylar yntalandyrý syılyqtarmen marapattaldy.
Atap óteıik, «Syr eli – jyr elinde» búgingi kúnge deıin jyrshy-jyraý, aqyn-aıtyskerlerdiń óneri keń kólemde nasıhattalyp keledi. 2016 jyly Qazaqstan Respýblıkasy Táýelsizdiginiń 25 jyldyǵyna oraı halyqaralyq aıtys pen dástúrli mýzykalyq óner festıvali uıymdastyrylsa, ótken jyly jeltoqsan aıynda «Parasatty poezııa» halyqaralyq shyǵarmashylyq kesh ótti.