Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynan týyndaıtyn mindetterdi júzege asyrý jáne Astana qalasynyń 20 jyldyq mereıtoıyna oraı Jambyl oblystyq fılarmonııasynyń uıymdastyrýymen «Balasaǵun» ortalyq konsert zalynda áıgili kompozıtor, ataqty kúıshi Nurǵısa Tilendıevtiń shyǵarmashylyǵyna arnalǵan «О́z elim» atty tanymdyq konsert ótti.
Jalpy, Nurǵısa Tilendıevtiń dırıjerligi de, kúıshiligi de, kompozıtorlyǵy da jalpaq jurtqa belgili. Qaraorman qazaqtyń qaıǵysy men qýanyshyn qatar ánge qosqan Nurǵısa Atabaıulynyń ánderi patrıottyq rýhqa, lırıkalyq saǵynyshqa toly. Bozbala kezinde qolyna qarý ustap qan maıdanǵa attanyp, ásker sapynda erlik kórsetkeni de urpaqqa úlgi. Al óner qaıratkeriniń dúnıege kelý tarıhy, ómir súrgen kezeńi, shyǵarmashylyq joly sııaqty qundylyqtar da kóptiń qyzyǵýshylyǵyn týdyratyny sózsiz. Mine, kesh barysynda dańqty óner ıesiniń ómiri men shyǵarmashylyǵyn arqaý etken derekti fılm kórsetilip, kórermenge kórnekti tulǵa jaıynda keń málimet berildi.
«Aqkerbez» bıshiler ansambliniń oryndaýyndaǵy «Shattyq» bıi shara shymyldyǵyn túrse, kompozıtordyń «Aqqý» kúıine myń burala bılegen Nıgora Davronovanyń óneri kópshilikti tánti etti. Nurǵısa Tilendıev shyǵarmashylyǵyna arnalǵan kesh barysynda «Alataý» toby, Maralbek Babaqulov, Anna Výnder, Ońal Azamatova, Ǵanı Mátebaev, Mádına Saǵynbekova jáne ózge de ónerpazdar kompozıtordyń ásem ánderin naqyshyna keltire oryndap, Áýlıeata aspanyn ánmen terbetti. Tipti Nurǵısadaı talant ıesine degen saǵynyshy men qurmetin halyq onyń ánderin ánshilermen qosyla shyrqap jetkizdi.
Hamıt Esaman, «Egemen Qazaqstan»
Jambyl oblysy