Jeksenbi kúni, ońtústikkoreıalyq Samsung kompanııasy jańa Galaxy S9 jáne S9+ smartfondaryn tanystyrdy. Prezentasııa Barselonadaǵy Halyqaralyq uıaly kongresste ótti, dep habarlaıdy RIA aqparattyq agenttigi.
Jańa smartfondardyń ereksheligi – artqy paneldegi elementterdiń tiginen ornalasýy. Al saýsaq izderiniń skaneri kameralar modýliniń astynda ornalasqan, bul obektıvtiń lastaný máselesin ońtaıly sheshýge kómektesedi.
S9 jáne S9 + telefonynyń dıspleıi 5,8 jáne 6,2 dıýımdy quraıdy, al maksımaldy ruqsat - Quad HD + (1440 h 2880 pıksel). Jedel jadtyń kólemi 4-ten 6 gıgabaıtqa deıin jetedi. Eki smartfonnyń da kiriktirilgen jady 64 gıgabaıtty quraıdy.
Jańa smartfondar úsh túrli bıometrııalyq aýtentıfıkasııany qoldaıdy. Olarda kóz, saýsaq izderin taný arqyly jáne adamnyń keskin kelbetin taný fýnksııalary iske qosylǵan. Sonymen birge, Galaxy S9 ı S9+ smatfondarynda Dedicated Fingerprint fýnksııasy arqyly saýsaq izderiniń biri telefondy buǵattaýǵa, al ekinshisi qorǵalǵan papkalardy ashý úshin qoldanylady.
Smartfondarda alǵash ret SmartThings qosymshasy ornatyldy, bul turmystyq tehnıkany jáne «aqyldy úıge» arnalǵan fýnksııalardy ózine qosyp alýǵa múmkindik beredi.
Jańa smartfondardyń resmı satylymy 19 naýryzda bastalady. Galaxy S9 telefonynyń Reseıdegi baǵasy 59,99 myń rýbl, Galaxy S9+ 66,99 myń rýbl bolady.
Aýdarǵan Mádına Jálelqyzy
«Egemen Qazaqstan»