Munaıly aýdanyndaǵy Shoǵy Muńaluly atyndaǵy №5 jalpy bilim berý orta mektebinde tárbıe jumysynyń jyldyq josparyna sáıkes múmkindigi shekteýli balalarǵa arnalǵan Qaıyrymdylyq baly ótkizildi. Qaıyrymdylyq baly qoǵamda shapaǵat, adamgershilik jáne rııasyz ózara járdem qundylyqtaryn bekitýge, turaqtylyqtyń, qoǵamdyq kelisim men jalpy ulttyq birliktiń mańyzdy faktorlary retinde Qazaqstandyqtardyń ómiri men densaýlyǵy jaǵdaıyna qamqorlyq kórsetýdi kúsheıtýge baǵyttalǵan.
Aýdanda alǵash ret uıymdastyrylǵan sharaǵa Munaıly aýdandyq ákimdigi men Munaıly aýdandyq jastar resýrstyq ortalyǵy qoldaý kórsetse, «О́rken» aýla klýby, «SRISTALS BRIDAL» qalyńdyq salony, «Dástúr» meıramhanasy, qus fermasy, «Mańǵystaý Aǵaıyn Jarnama» jarnamalyq-óndiristik kompanııasy, «PROMAX» fotostýdııasy demeýshilik tanytty.
Merekelik sharanyń basty qonaqtary retinde Mańǵystaý aýylynan – 43, Basqudyq aýylynan – 21, oblystyq múmkindigi shekteýli balalarǵa arnalǵan mektep-ınternatynan – 16, barlyǵy 90 bala shaqyryldy.
Qaıyrymdylyq balyna túsken 462352 teńge kólemindegi qarjyǵa árbir balaǵa «aqqý júninen jasalǵan kórpe» syıǵa berildi, sondaı-aq kelgen búldirshinderge «Dástúr» meıramhanasy aq dastarhan jaıdy.
Sharada múmkindigi shekteýli balalardyń armanyn oryndaýǵa talap jasaldy. Mysaly, óz aıaǵymen júre almaıtyn Arıstanov Dinmuhammedtiń bolashaqta fýtbolıst bolǵysy keletindigi jóninde beıneúzik kórsetilip, oǵan «Qaırat» fýtbol komandasynyń beldi oıynshysy ózimen attas Dinmuhammed Súleımenov aǵasynan beınesálemdeme men fýtbolshylar kıimi, doby tosyn syı retinde tabystaldy. Al, oblystyq múmkindigi shekteýli balalar mektep ınternatynyń oqýshysy, bolashaqta munaı salasynyń qyzmetkeri bolýdy armandaıtyn Amanov Aıbektiń bala armany oryndalsyn degen nıetpen «Mańǵystaý túbegi jáne ondaǵy qazba baılyqtar» jaıly kitap syıǵa berilip, odan ary osy oqýshynyń oryndaýynda ym-ısharamen «Vals» áni shyrqaldy.
Qazaqstanda turatyn árbir bala qazaqtyń salt-dástúri, mádenıeti, qala berdi ónerimen sýsyndap ósýi tıis. Osy oraıda oblystyq múmkindigi shekteýli balalar mektep-ınternatynyń búldirshinderi «Jaılaý», «Qyzǵaldaq» bılerin kórermen nazaryna usyndy.
№5 orta mekteptiń 8-synyp oqýshysy Aljan Mıras bolashaqta qus fermasyn ashýdy armandaıtyndyǵyn beınerolık arqyly jetkizgen bolatyn. Mırastyń osy armanyn oryndaǵysy kelgen jeke kásipker aǵasy Esen Boranbaıuly oǵan eki ekzotıkalyq qusty syıǵa tartyp, bolashaq kásibiniń negizin qalap bergendeı boldy.
Atalǵan shara budan ári týylǵanynan jaryq álemdi kóre almaı júrgen kishkentaı Isaeva Ádeminiń bolashaqta úlken sahnada óner kórsetip, ánshi bolǵysy keletindigi jáne elimizge tanymal «Sát» trıosyndaǵy ánshi aǵalarymen sýretke túsýdi qalaıtyndyǵy jónindegi beıneúzikpen jalǵasyn tapty. Bala armany sol sahnada shynaıy oryndaldy desek te bolady. Iаǵnı, Ádeminiń oryndaýynda «Áke-ana» áni tyńdaldy jáne «Sát» trıosyndaǵy Sapar aǵasy osy qaıyrymdylyq balyna arnaıy qonaq retinde shaqyrylyp, balaqaımen estelik sýretke tústi, sonymen qatar, ónerpaz aǵasy kelgen balalarǵa aq tilegin bildirip, ánnen shashý shashty.
Munaıly aýdandyq múmkindigi shekteýli balalarmen jumys bólimshesi men oblystyq mektep-ınternatynyń pedagogtary oqýshylar jasaǵan qolóner buıymdarynan kórme jasady, sonyń ishindegi 5 úzdik buıym aýksıonǵa salynyp, odan túsken qarjy kópshilik aldynda qolóner ıelerine tabystaldy. Aýksıonǵa salynǵan qolóner buıymynyń eń joǵary baǵasy 7000 teńgeni qurady.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy