Búgin Májiliste Palata Spıkeri Nurlan Nyǵmatýlın Búkilálemdik Banktiń Qazaqstandaǵy turaqty ókili Ato Braýnmen jáne Ortalyq Azııa boıynsha óńirlik dırektory Lılııa Býrýnchýkpen kezdesti, dep habarlaıdy Májilistiń baspasóz qyzmeti.
Kezdesý barysynda Nurlan Nyǵmatýlın atalǵan qarjylyq ınstıtýtpen qarym-qatynas ornaǵan 25 jyl ishinde atqarylǵan jumystarǵa toqtaldy. Májilis Spıkeri atap ótkendeı, osy ýaqyttar ishinde Qazaqstanda 46 joba qarjylandyrylǵan, josparda taǵy da 48 mańyzdy joba bar.
2002 jyldan beri birlesken ekonomıkalyq zertteýler baǵdarlamasy qolǵa alynyp keledi. О́tken jyly Qazaqstan men Búkilálemdik Bank arasynda 2012-2017 jyldarǵa arnalǵan áriptestik Strategııasy tabysty júzege asyrylǵan.
Memleketimizdiń damý baǵyty jaıly sóz etkende Májilis Tóraǵasy qazirgi ýaqytta Qazaqstan Prezıdentiniń bastamasymen júzege asyrylyp jatqan «Nurly Jol» baǵdarlamasynyń mańyzdylyǵyna toqtaldy. Sonyń ishinde, áleýmettik jáne energetıkalyq ınfraqurylymdar, shaǵyn jáne orta bıznesti damytýǵa arnalǵan basqa da iri jobalarǵa aıryqsha nazar aýdardy.
Búkiálemdik Bank ókili bizdiń elimizdiń táýelsizdik jyldarynda jetken jetistikterine joǵary baǵa berip, atalǵan Bank úshin Qazaqstanmen birlese jumys jasaý maqtanysh ekenin jetkizdi. Al, Lılııa Býrýnchýktyń pikirinshe, Qazaqstan – Búkilálemdik Banktiń Ortalyq Azııadaǵy mańyzdy áriptesi jáne bizdiń elmen birlesken jumys eń negizgi baǵyttardyń biri. Sebebi bul jerde iri aýqymdy jobalar iske asyrylady.
Kezdesý barysynda parlamentter yqpaldastyǵy máselesi de nazardan tys qalǵan joq.
Májilis Tóraǵasynyń aıtýynsha, depýtattyq korpýstyń zańnamalyq jumysynda Bank mamandarynyń tájirıbesi men biliktiliginiń de oń áseri bar. Máselen, aýylsharýashylyǵyn memlekettik qoldaý sharalaryn jetildirý, salany sıfrlandyrý, sondaı-aq, ınnovasııalyq qarjylyq tetikterdi engizý múmkindikteri taqyryptarynda pikir almasýdyń mańyzdylyǵy zor.