Premer-Mınıstrdiń birinshi orynbasary Asqar Mamın Mańǵystaý oblysyna jumys sapary barysynda «Aqtaý teńiz porty» AEA damytý men Kaspıı logıstıkalyq ınfraqurylymy josparyn júzege asyrý boıynsha keńes ótkizdi.
«Aqtaý teńiz porty» AEA AQ Basqarma tóraǵasy Baýyrjan Qaıratovtyń baıandaýynsha, «Aqtaý teńiz porty» AEA 2002 jyly eksportqa baǵyttalǵan joǵary tehnologııalyq óndiriske ınvestısııa tartý maqsatynda qurylǵan bolatyn. Munda 27 qatysýshy tirkelgen. Italııa, Túrkııa, Germanııa, Qytaı, Anglııa, Ázerbaıjan ınvestorlary qyzmet etedi. Qazirdiń ózinde 18 ınvestısııalyq jobalar júzege asyrylyp, 1300 jumys orny ashyldy. 260,4 mıllıard teńgeniń ónimi óndirilip, bıýdjetke 23,6 mlrd. teńge túsim tústi.
Mańǵystaý oblysynyń ákimi Eraly Toǵjanov «Aqtaý teńiz porty» aýmaǵynda júzege asyrylatyn jobalar erekshe baqylaýda ekenin atap ótti.
Premer-Mınıstrdiń birinshi orynbasary Asqar Mamın AEA qatysýshy kásiporyndar ózderiniń ónimderin ishki jáne syrtqy naryqtarǵa shyǵarýǵa básekelestikke saı bolýy kerektigin aıtty. AEA shetel ınvestısııasyn tartýdy belsendi júrgizý qajet ekendigine, bul másele Úkimettiń erekshe baqylaýynda turǵandyǵy týraly erekshe atap ótti.
Kaspıı óńirindegi 2018-2020 jyldarǵa arnalǵan logıstıkalyq ınfraqurylymdy damytý jospary týraly «QTJ» UK» AQ vıse-prezıdenti Sanjar Elýbaev baıandady.
Onyń aıtýynsha, 2017 jyly Qazaqstannyń Kaspıı mýltımodaldyq tizbegi 5,5 mıllıon tonna júk óńdedi. Onyń ishinde qurǵaq jáne paromdyq júkter jalpy júkterdiń 80% deıin jetkizildi. Bul kórsetkish 2016 jyly 60% bolatyn.
2018 jyly Qazaqstan porttary arqyly ótkizý jospary on mıllıon tonnadan astam bolsa, ondaǵy qurǵaq jáne paromdyq júkter kólemi 80% saqtalady. Bul mejeni 2020 jyldary 16,7 mıllıon tonnaǵa jetkizý josparda bar. 2018 jyly 35 myń JFE konteıner tasymaldaý josparlansa, 2020 jyldary ony 300 myń JFE-ǵa jetkizý kózdelip otyr.
2017 jyly Quryq porty arqyly 1,5 mıllıon tonna túrli júkter ótkizildi. Bıylǵy jyly ony 4,5 mıllıon tonnaǵa jetkizý josparlanyp otyr.
Premer-Mınıstrdiń birinshi orynbasary Kaspıı boıyndaǵy logıstıkalyq ınfraqurylym nysandary Transkaspıı kólik dálizin damytýdaǵy negizgi tizbek ekendigine mán berdi. Sondaı-aq, A.Mamın Mańǵystaý oblysyna jumys sapary barysynda Quryq portynyń qyzmetimen, shekaralyq jáne keden aımaǵy ınfraqurylymymen, áleýmettik nysandarmen, sonymen qatar Kavkaz óńiri, Reseı, Túrkııaǵa avtokólikterdi ótkizý úderisimen tanysty. Aǵymdaǵy jyly 20 myń tehnıkany parom arqyly ótkizý josparlanyp otyr. Bul ótken jyldyń sáıkes merzimimen salystyrǵanda eki esege joǵary kórsetkish.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy