Parlament Senatynda «Qazaqstan Respýblıkasynyń azamattyq qoǵamdy damytý máseleleri boıynsha zańnamasyn jetildirý» taqyryby boıynsha dóńgelek ústel otyrysy ótti, dep habarlaıdy Senattyń baspasóz qyzmeti.
Senat Tóraǵasynyń orynbasary Sergeı Gromov ekonomıkanyń, saıasattyń jáne qoǵamdyq sananyń jańǵyrýy jaǵdaıynda azamattyq qoǵam ınstıtýttarynyń róli arta túskenin atap ótti.
«100 naqty qadam» Ult josparyn iske asyrý aıasynda memleket pen azamattyq qoǵam arasyndaǵy únqatysý tetigi retinde qurylǵan qoǵamdyq keńesterdiń róline toqtaldy. Bul memlekettik emes ınstıtýtattar memlekettik sheshimderdi qabyldaýdyń aıqyndyǵyn arttyrýǵa arnalǵan. Baıandamashynyń aıtýynsha, azamattyq qoǵamdy basqarýǵa qatysý deńgeıin arttyrý úshin qoǵamdyq kelisimderdiń, qoǵamdyq baqylaý júıesiniń qyzmetin odan ári jetildirý kerek», dedi S.Gromov.
Senat Tóraǵasynyń orynbasary bılik organdaryn úkimettik emes uıymdarmen ózara is-qımyldyń jańa deńgeıine kóterilýge shaqyrdy, ol ıdeıalar men azamattyq bastamalardyń kúsh-qýatyn eldegi ótkir máselelerdi sheshýge paıdalanýǵa múmkindik beredi. Onyń aıtýynsha, Áleýmettik bastamalardy iske asyrýda, azamattardyń quqyqtary men múddelerin qorǵaýda memleket pen bıznestiń úkimettik emes uıymdarmen yntymaqtastyǵyn qamtamasyz etý úshin ornyqty quqyqtyq negiz jasalýy tıis. Sondaı-aq úkimettik emes uıymdar qyzmetindegi jobalardyń, baǵdarlamalardyń nátıjeleri men áserlerimen qosa áleýmettik-ekonomıkalyq yqpalyna da baǵa berilýi tıis.
Senattyń Áleýmettik-mádenı damý jáne ǵylym komıtetiniń tóraǵasy Birǵanym Áıtimova Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda elimizdiń áleýmettik-ekonomıkalyq tabystarynyń negizi retinde bizdiń basty qundylyqtarymyz bolyp otyrǵan azamattyq álemdi, ultaralyq jáne konfessııaaralyq kelisimdi ataǵanyn eske saldy. Memleket turaqtylyqty saqtaý, elimizdegi konfessııaaralyq kelisim men toleranttylyqty nyǵaıtý jóninde naqty sharalar qabyldady. Qazaqstanda resmı tirkelgen memlekettik emes uıymdardyń qyzmetin qamtamasyz etý úshin qajetti jaǵdaı jasalǵan. Senator sonymen birge qazirgi kezde memlekettik áleýmettik tapsyrys salasyndaǵy zańnama jetildirýdi talap etetinin atap ótti.
«Memlekettiń úkimettik emes uıymdardy qoldaýy azamattyq sektordyń áleýmettik-ekonomıkalyq mindetterdi sheshýge qatysýynyń tıimdiligin arttyrýǵa yqpal etetinin álemdik tájirıbe kórsetip otyr. Qosymsha memlekettik qurylymdar jasaǵansha memleketke óz tarapynan aıqyn, naqty jáne baqylanatyn mindettemelerdi aıyrbastaıtyn memlekettik emes kommersııalyq emes uıymdarǵa qarjy bólý tıimdirek bolýda», - dedi B.Áıtimova.
Dóńgelek ústelge qatysýshylar aldynda din isteri jáne qoǵamdyq kelisim mınıstri Nurlan Ermekbaev sóz sóıledi.
Talqylaýǵa din isteri jáne qoǵamdyq kelisim mınıstriniń orynbasary Abzal Núkenov, «Aımaq» qoǵamdyq qorynyń prezıdenti Aıgúl Soloveva, Qaraǵandy obylysy ákiminiń orynbasary Jandos Ábishev, Kásipodaqtar federasııasy tóraǵasynyń orynbasary Erlan Saıyrov, «Qazaqstan-2050» jalpy ulttyq qozǵalysy keńesiniń tóraǵasy Muhtar Mankeev, «Qazaqstandaǵy parlamentarızmdi damytý qory» QQ prezıdenti Záýresh Battalova, Azamattyq qoǵamdy damytý assosıasııasynyń atqarýshy dırektory Jámıla Asanova jáne basqalar talqylaýǵa qatysty.
Qazirgi kezde Parlament Májilisiniń qaraýynda jatqan «Qazaqstan Respýblıkasynyń keıbir zańnamalyq aktilerine kommersııalyq emes uıymdardyń qyzmeti máseleleri boıynsha ózgerister men tolyqtyrýlar engizý týraly» zań jobasy pikirsaıys taqyryptarynyń birine aınaldy. Memlekettik organdar men úkimettik emes uıymdardyń arasyndaǵy ózara is-qımyl máseleleri qozǵaldy. Atap aıtqanda, qoǵamdyq keńesterdiń mindetteri, úkimettik emes uıymdardyń áleýmettik áriptestigin nyǵaıtý, memlekettik áleýmettik tapsyrys sapasyn arttyrý, úkimettik emes uıymdarǵa granttar bólý, «Rýhanı jańǵyrý» baǵdarlamasy aıasynda «Atameken» baǵdarlamasyn iske asyrý týraly áńgime órbidi.
Dóńgelek ústel otyrysynda Parlament depýtattary men basqa da qatysýshylar talqylanyp otyrǵan taqyryp boıynsha óz oılaryn ortaǵa saldy. Azamattyq qoǵamdy damytý jáne onyń quqyq qoldaný tájirıbesi máseleleri boıynsha zańnamany jetildirý týraly naqty usynystar aıtylyp, tıisti memlekettik organdar men múddeli uıymdarǵa jiberiletin boldy.