Qazaq halqy «arý» degen sózdiń ózin ádemiliktiń, ádeptiliktiń, ınabattylyqtyń, sulýlyqtyń belgisi dep tanyǵan. Ádemi, kórikti, shyraıly, sulý, ajarly, arý dep sıpattalatyn qyzdarymyzdyń jan dúnıesi názik, adal mahabbat ıesi bolǵanyn, dáýletke, baılyqqa qyzyqpaǵanyn, mahabbat atty asyl sezimdi aıryqsha qasterlep, aıalaǵanyn jyr-dastandardan bilemiz. Arý qyzdyń ómirdegi eń asyl muraty – ana bolý. Ana – dúnıedegi eń aıaýly sóz. Bul sózge bar álemniń meıirimi men mahabbaty syıyp tur. Ana – ómirdiń, tirshiliktiń tunyq bastaýy. Tunyqtyq ta, móldirlik te, tazalyq pen mahabbat ta Ana sóziniń astary, shynaıy maǵynasy.
Uly Dalany mekendegen halqymyzdyń bir tilde sóılep, ádet-ǵuryp, salt-dástúriniń, minez-qulyqtarynyń da uqsas bolyp kelýi burynǵy ótken Domalaq ana, Aısha bıbi, Jaǵan begim, Ulpan, Zere, Uljan syndy analarymyzdan nár alǵan tárbıeniń nátıjesi. Erke qyz, ımandy áıel, qasıetti ana solardan shyqqan. Sóıtip, qazaqtyń batyl, aqyn, aqyldy qyzdary ultty tárbıeledi. Olar erkindik pen eserliktiń arajigin ajyrata bilgen parasatty, tapqyr, tózimdi boldy, qıyn-qystaý kúnde shashyn tóbesine túıip jaýǵa shapty, er azamatqa aqylshy, senimdi serik bola bildi.
О́zin namys pen uıattyń ókili retinde sezinip, soǵan saı bola alǵan qyz ǵana arýlyq deńgeıge jetedi. Demek arýlyqty ar qorǵaǵan analardan úırenetin bolsaq, ımandy, ojdan men abyroıdy, ar-uıatty tý etý – ár boıjetkenniń ómirlik maqsaty.
Ulttyń urpaǵyn sol halyqtyń rýhynda ósirip, árbir kishkentaı memleket – otbasynyń tynyshtyǵyn, bereke men birligin saqtap, jylylyq pen jan shýaǵyna bólep, sol arqyly eldiń, memlekettiń dińin ustap otyrǵan asyl analarymyzǵa myń taǵzym, sheksiz alǵys!
Aıda Manap,
«Bóbek» UǴPBBSO «О́zin-ózi taný» oqý-saýyqtyrý kesheniniń qyzmetkeri