Almatyda 1000-nan astam sportshynyń qatysýymen shyǵys jekpe-jegi festıvali ótti. «Sporttyq Almaty» jobasynyń aıasynda uıymdastyrylǵan aıtýly sharada aralas jekpe-jek, «Fullcontact karate», «Shotokan karate», «Taekwondo» jáne «Combat aikido» sport túrlerinen arnaıy jarystar uıymdastyryldy.
Sońǵy jyldary shyǵys jekpe-jegine jatatyn sport túrlerimen aınalysýǵa den qoıǵan el jastarynyń sany artyp keledi. Úzdikter básekesinde elimizdiń birneshe qalasy men kórshiles Qyrǵyzstannan kelgen 5-17 jas aralyǵyndaǵy sportshylar baq synady.
«Baǵanashyl» sport kesheninde óz ónerlerin kórsetken sportshylar, boz kilemde aıanyp qalǵan joq. Nátıjesinde, ár jas, salmaq dárejelerinde jeńimpazdar men júldegerler anyqtalyp, úzdik dep tanylǵandar medal, dıplom jáne arnaıy kýbokpen marapattaldy. Sonymen qatar sporttyń árbir túrine arnaıy syılyqtar berilip, «eń úzdik tehnıka», «jeńiske degen jigeri úshin» jáne «eń qysqa jekpe-jek» atalymdary boıynsha naǵyz myqtylar saralandy.
– Bul jarystan alǵan áserim erekshe. Taekvandodan birinshi oryn alyp, eki aılyq daıyndyǵymnyń zaıa ketpegenin dáleldedim. О́te rızamyn, qarsylastarym da osal bolmady. Bul sport túrimen aınalysqanyma eki jyl boldy, óte yńǵaıly ári tehnıkalyq sport dep sanaımyn. El chempıonaty men halyqaralyq jarysqa da qatysyp úlgerdim, nátıje jaman emes, – deıdi taekvondadan +65 kg salmaq dárejesinde top jarǵan almatylyq Nurjan Jumabaev.
Nurjannan bólek sporttyń basqa da túrleri boıynsha júzden júırik shyqqan jeńimpazdardyń qýanyshynda shek joq. Júldeli orynǵa ilikpegenderdiń de júzinen ókinishtiń nyshany baıqalmaıdy. Eń bastysy ózara tájirıbe almasýǵa múmkindik týǵyzatyn osyndaı festıvalder men jarystar jıi ótip tursa deıdi jas sportshylar.
Arman OKTIаBR, «Egemen Qazaqstan»
ALMATY