«Nur Otan» partııasynyń Ortalyq apparatynda 1 naýryz – Partııa kúnine oraı uıym qataryna qabyldaý saltanaty ótti.
Sharaǵa jas nurotandyqtarmen qatar, uıymnyń qalyptasýyna zor eńbek sińirgen aldyńǵy býyn ókilderi de arnaıy qatysty. Partııa Tóraǵasynyń birinshi orynbasary Máýlen Áshimbaev barsha nurotandyqtardy aıtýly merekemen quttyqtap, jumystaryna tabys tiledi. Sondaı-aq ol «Nur Otannyń» aldynda Elbasy, partııa Tóraǵasy Nursultan Nazarbaev aıqyndap bergen partııa qyzmetin jańǵyrtýǵa baǵyttalǵan mańyzdy mindetter turǵanyna nazar aýdardy.
Osydan týra 19 jyl buryn, ıaǵnı 1999 jyldyń 1 naýryzynda partııanyń birinshi tarıhı sezi ótip, onda Elbasy biraýyzdan «Nur Otan» partııasynyń Tóraǵasy bolyp saılandy. Sodan beri partııa jylnamasyna altyn áriptermen jazylǵan dál 1 naýryzda Partııa kúnin atap ótý ıgi dástúrge aınaldy. Osy ýaqyt aralyǵynda «Nur Otan» halqymyzdyń áleýmettik jaǵdaıyn jaqsartyp, Qazaqstannyń damýyna baǵyttalǵan Elbasy tapsyrmalaryn júzege asyrýǵa úlken úles qosty. Partııa Saıası keńesiniń keńeıtilgen otyrysynda Memleket basshysy elimizdegi jetekshi saıası kúshti HHI ǵasyrdyń barlyq talaptaryna saı, ınnovasııaǵa beıim, joǵary tehnologııaly, kreatıvti partııaǵa aınaldyrý jóninde naqty tapsyrma berdi. Soǵan oraı nurotandyqtardyń bilek sybanyp iske kiriskenin aıtqan Máýlen Áshimbaev Elbasy júktegen mindetterdi oryndaý úshin kadrlyq aýdıt júrgizý, saraptamalyq jumystardy kúsheıtý, jastardy kóptep jumyldyrý sııaqty tyń bastamalardyń bereri mol ekenine toqtaldy. Osyndaı ıgi ister «Nur Otandy» zamananyń jańa bıigine kótermek.
– Biz ózimizdiń basty mindetimizden jańylmaı, Elbasynyń senimdi tiregi bolyp, elimizde qolǵa alynǵan jańǵyrtý jumystaryna júıeli túrde qatysýymyz kerek. Halyqty alańdatqan qoǵamdaǵy ózekti máselelerdi jedel ári ońtaıly sheshý úshin de «Nur Otan» elmen etene jumys istep, barlyq bastamanyń basy-qasynda bolýy tıis, – dedi Máýlen Áshimbaev.
Osy rette búgingi merekege oraı elimizdiń barlyq óńirinde partııa qataryna qabyldaý rásimi ótkizilgenin atap ótken jón. Astana qalasynyń ózinde ár salada eńbek etip júrgen 19 azamatqa partııa bıleti tabys etildi. Olardyń qatarynda «Qazaqstandaǵy 100 jańa esim» jobasynyń qatysýshylary – toǵyzqumalaqtan sport sheberi Ásel Dálıeva, voleıboldan paralımpıadalyq jastar quramasynyń kapıtany Serik Esmatov, shyǵysqazaqstandyq muǵalim Valentın Alıfanov, «Úzdik pedagog-2017» tósbelgisiniń ıegeri Aleksandr Kınsel jáne opera ánshisi Medet Shotabaev bar. Sondaı-aq joǵary sanatty hırýrg Danııar Jaqypov, «Zerde» ulttyq holdınginiń basqarma tóraǵasy Rýslan Eńsebaev, qaraǵandylyq kásipker Lıýdmıla Vaımer, Nazarbaev Ýnıversıtetiniń stýdenti, «Kompıýterli fızıka» halyqaralyq olımpıadasynyń jeńimpazy Mırat Jekeev, soltústikqazaqstandyq kásipker Ivan Zenchenko, Qurmanǵazy atyndaǵy respýblıkalyq baıqaýdyń gran-prı ıegeri Qaırat Kákimov, pedagogıka ǵylymdarynyń magıstri Ásel Qojahmetova, Qaraǵandy oblysyndaǵy «Atameken» kásipkerler palatasynyń dırektory Ernar Qulpeıisov, qostanaılyq jas kásipkerler Nursultan Qasymov pen Qadyrjan Maqanǵalı, «Qazaqstan-2050» jalpyulttyq qozǵalysy keńesiniń tóraǵasy Muhtar Mankeev, «Astana Innovations» aksıonerlik qoǵamynyń basqarma tóraǵasy Oljas Sartaev jáne PhD, dosent Janar Taıjanova da búgin partııalyq bıletterin aldy. Jańadan qabyldanǵan nurotandyqtarǵa partııalyq bıletterin saltanatty jaǵdaıda tapsyrǵan Máýlen Áshimbaev olardyń Elbasymyzdyń salıqaly saıasatyn júzege asyrýǵa jáne partııanyń odan ári damyp, nyǵaıýyna úlken úles qosatyndaryna senim bildirdi.
– Biz partııa qataryna óz isiniń sheberi, patrıot, elimizdi jańǵyrtýǵa múddeli, partııa kún tártibin júzege asyrýǵa qatysqysy keletin azamattardy qabyldaýymyz kerek. Búgin partııa múshesi atanyp otyrǵan jandardy solardyń qatarynda dep esepteımin. Biz sizderdi únemi qoldap otyramyz. Aldaǵy ýaqytta elimizdiń jarqyn bolashaǵy jolynda birlesip jemisti jumys istep, bıik belesterdi baǵyndyramyz dep senemin, – dedi partııa Tóraǵasynyń birinshi orynbasary.
Is-sharaǵa «Nur Otannyń» saıası uıym retinde qalyptasyp, búgingideı bıik dárejege jetýine zor eńbek sińirgen partııa ardagerleri men qurmetti músheleri de arnaıy shaqyryldy. Máýlen Áshimbaev el damýy jolynda eseli eńbek etken jandardy partııa Tóraǵasy jáne barsha nurotandyqtar atynan kásibı merekelerimen quttyqtap, alǵys bildirdi.
Is-shara sońynda «Nur Otan» partııasy Tóraǵasynyń birinshi orynbasary barsha qazaqstandyqtardy Alǵys aıtý kúnimen quttyqtap, bul kúnniń partııamyzdyń basty merekesimen qatar kelýinde úlken mán bar ekenin aıtty. Sondaı-aq ol Alǵys aıtý kúni Qazaqstan halqynyń yntymaǵy men birligin arttyratyn asa zor mańyzǵa ıe ekenin de sóz etti.
Joldybaı BAZAR, «Egemen Qazaqstan»