Búgin Pavlodar qalasynda ótip jatqan VII qysqy Ýnıversıadadan alǵashqy jeńimpazdar men júldegerler anyqtaldy. Kereký jerinde jalaýyn jelbiretken eń tartysty báseke – prezıdenttik kópsaıysta 101 qatysýshy baq synady.
Jarystyń alǵashqy kúnderinde prezıdenttik kópsaıysta áıelder arasynda jalpy komandalyq esep boıynsha Pavlodar memlekettik pedagogıkalyq ýnıversıteti stýdentteri jeńistiń joǵary tuǵyryna kóterilse, ekinshi oryndy Soltústik Qazaqstan memlekettik ýnıversıteti ıelendi. Júldeli úshinshi orynda – Pavlodar memlekettik ýnıversıteti. Al, erler arasyndaǵy prezıdenttik kópsaıysta Soltústik Qazaqstan memlekettik ýnıversıteti altynnan alqa taqsa, kúmis júldeni Qostanaı pedagogıkalyq ýnıversıteti enshiledi. Qola júldeni Shyǵys Qazaqstan memlekettik ýnıversıteti qanjyǵasyna baılady.
Sonymen qatar qyzdar arasynda úzdiktiń úzdigi Soltústik Qazaqstan memlekettik ýnıversıtetiniń stýdenti Kozlova Vıktorııa bolsa, erlerden Qostanaı memlekettik ýnıversıtetiniń stýdenti Makýshenko Vıacheslav atandy.
Jarysty uıymdastyrýshy – QR BǴM Ulttyq ǵylymı-praktıkalyq dene tárbıesi ortalyǵy.
Marapattaý rásimin Ulttyq ǵylymı-praktıkalyq dene tárbıesi ortalyǵy bas dırektorynyń orynbasary Sadyq Aıashev júrgizdi. Jeńimpazdar men júldegerler Ýnıversıada dıplomdarymen, medalmen jáne kýbokpen marapattaldy.