Qazaqstan Respýblıkasy IIM buıryǵyna sáıkes, elimiz boıynsha «Baqytty balalyq shaqty-qorǵaý» jobasy aıasynda keń aýqymdy respýblıkalyq aksııasy ótýde. Osyǵan oraı, Mańǵystaý oblysy IID JPQ-ń ıývenaldy polısııa tobynyń aǵa ınspektory, polısııa podpolkovnıgi Elvıra Kasanova men AQIIB JPQ polısııa kapıtany Nurlan Rahaev, «Qazaq-Túrik lıseıi» shákirtterimen kezdesti. Sharaǵa bilim ordasynyń ustazdary men oqýshylardyń ata-analary da qatysty.
Aksııanyń maqsaty- balalardyń quqyǵyn qorǵaý, jasóspirimderge quqyqtyq, zańdylyq turǵysynda túsindirý jumystaryn júrgizý bolyp tabylady. Kezdesýde tártip saqshylary «Qaýipsiz ınternet», «Temeki buıymdary», «Alkogoldik ónimder», sondaı-aq 21-ǵasyr derti atalatyn «Nashaqorlyq» taqyrybynda áńgime órbitip, tyń oılaryn ortaǵa saldy. Oqýshylarǵa slaıd arqyly ishimdik pen shylym ónimderiniń zııandy tustary túsindirilip, ınternetten keletin qaýiptiń túri de aıtyldy. Ishki ister organdarynyń mamandary oqýshylardyń adam densaýlyǵy men ómirine qaýip tóndiretin zııandy nárselerden aýlaq bolýǵa shaqyrdy. Al, bilim ordasynyń tálimgerleri óz kezeginde kókeıinde júrgen saýaldaryn qoıyp, tjaýaptaryn aldy.
Mektep oqýshylary men ata-analar mundaı kezdesýler jıi uıymdastyrylyp tursa eken degen usynystaryn jetkizdi.
Polıseılerdiń aıtýynsha, jasóspirimder arasynda psıhotroptyq, narkotıkalyq, taksıkomandyq ónimderdi qoldaný kórsetkishi joqtyń qasy. Sondaı-aq, kóshede nemese qoǵamdyq oryndarda ustalatyn jasóspirimniń qatary da azaıǵan. Alaıda, ókinishti jaǵy bar. Esesine temekige áýes jastarmen, ári ǵalamtorǵa táýeldi balalarmen IID-niń Iývınaldy polısııa tobynyń ınspektorlary únemi qadaǵalaý jumystaryn júrgizip, baqylap otyrady.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy