Tapsyrmalar múltiksiz oryndalýy tıis

Alqaly jıynda aldymen Úkimet basshysy Elbasy ja­rııa­laǵan bes áleýmettik bastama bo­ıynsha memlekettik organdarǵa tıis­ti tapsyrmalar berdi.

«Memleket basshysynyń óz bas­tamalaryn arnaıy Úndeý arqyly jarııalap, onda qazaqstandyqtarǵa shynaıy alǵysyn bildirýi onyń mańyzdylyǵyn arttyra túsedi. Bul – Elbasynyń halqyna usynǵan prezıdenttik ári perzenttik syıy. Ol bastamalardyń árqaısysy búgingi tańda halyqtyń kókeıinde júrgen eń mańyzdy máselelerdi qamtıdy», dedi B.Saǵyntaev. Úki­met basshysy halyqtyń áleýmettik ómirine túbegeıli ózgerister alyp keletin barlyq qadamdar bo­ıynsha biryńǵaı jol kartasy ázir­lenetinin aıtyp, tıisti mınıstr­likterge naqty tapsyrma­lar júktedi. «Qashanda halqy­nyń jan dúnıesine tereń bo­ılap, eliniń júregindegi armanyn dóp basatyn Elbasynyń bastamalaryn múltiksiz júzege asyryp, tııa­naqty oryndaý – bárimizge syn! Son­dyqtan biz barlyq kúsh-ji­ger­imizdi jumyldyryp, Elbasy júk­tegen, el kútken údeden shyǵa bi­lýge tıispiz», dedi Premer-Mı­nıs­tr.

Infraqurylymdy damytýdyń dańǵyly

Úkimet otyrysynda ınfra­qu­rylymdy damytýdyń 2015-2019 jyldarǵa arnalǵan «Nurly jol» memlekettik baǵdarlamasynyń iske asyrylý barysy týraly Ulttyq ekonomıka mınıstri Tımýr Sú­leımenov, Qarjy mınıstri Ba­qyt Sultanov, Investısııalar jáne damý mınıstri Jeńis Qasymbek, sonymen qatar birqatar oblys ákimderi baıandady.

Málim bolǵandaı, memlekettik baǵdarlamanyń birinshi baǵyty – avtojol salasyn damytý aıasynda 2017 jyly 4,4 myń km avtomobıl joldary jóndeldi. Nátıjesinde 2017 jyly 22 avtomobıl jol­darynyń jobalarynda 600 km avtojol qaıta jańǵyrtylǵan, bul jospardyń 100 paıyzyn qu­raıdy. Al jyl qorytyndysy bo­ıynsha 528 shaqyrym joldy ashý josparlanǵan.

Ekinshi baǵyt – logıstıkalyq jobalardy júzege asyrý aıasynda elimizdiń tranzıttik áleýetin arttyrý úshin Quryq temir jol parom termınaly iske qosyldy. «Osy joba boıynsha júkti aýystyryp tıeýdiń josparly kórsetkishi 50 paıyzǵa artyǵymen oryndalyp, 1,5 mln tonnany qurady. Sonymen qatar 2017 jyldyń jeltoqsan aıynda Quryq portynda avtokólik parom termınalynyń testilik iske qosylýy júzege asyryldy», dep atap ótti Ulttyq ekono­mıka mınıstri T.Súleımenov. Av­tokólik parom termınalynyń tolyq qurylysyn aıaqtaý 2018 jyl­ǵa belgilengen. Onyń jobalyq qýat­tylyǵy jylyna 2 mln tonna júk­ti quraıdy. Jobanyń jalpy qýat­tylyǵy jylyna 6 mln tonnany quraıdy.

«Nurly jol» baǵdarlamasynyń úshinshi baǵyty – turǵyn úı-kommýnaldyq sharýashylyǵyn jańǵyrtý aıasynda 2017 jyly josparlanǵan 700 km ınjenerlik jú­ıeniń 765 km-i janǵyrtyldy. «Nur­ly jol» memlekettik baǵdar­la­masynyń sheńberinde TKSh-ny qarjylandyrý elimizde ınje­nerlik jelilerdiń tozýy 67 paıyz­dan 60 paıyzǵa tómendegen. Bıyl­ǵy jyly shamamen 800 km ınje­nerlik jelilerdi salý jáne qaıta jań­ǵyrtý josparlanyp otyr. Bul atalǵan kórsetkishti qosymsha 3 pa­ıyzǵa tómendetedi dep kúti­lýde.

Tórtinshi baǵyt – apatty mek­tep­terdi jáne úsh aýysymdyq oqy­týdy joıý sheńberinde 2017 jyl­dyń qorytyndysy boıynsha josparlanǵan 76 mekteptiń 73 mektebi salyndy. Bilim jáne ǵylym mınıs­tr­liginiń aqparatyna sáıkes, qal­ǵan bilim berý obek­tileri aǵym­daǵy jyldyń I toqsa­nynyń aıaǵy­na deıin paıdalanýǵa beriledi. Jal­py, memlekettik baǵdarlamany iske asyrý jyldarynda 108 mektep salynǵan.

Besinshi mindet – shaǵyn jáne orta bıznesti ınfraqurylymmen qamtamasyz etý aıasynda 2017 jyly 20 shaǵyn jáne orta bıznes jobasy, onyń ishinde Qostanaı jáne Almaty oblystaryndaǵy 2 ın­dýstrııalyq aımaq qajetti ın­fra­­qurylymmen qamtamasyz etildi.

2017 jyldyń qorytyndysy bo­ıynsha, jetkiliksiz ınfra­qurylymdy jetkizýge baǵyttalǵan 1 teńge bıýdjet qarajaty jeke sektordan 28 teńge ınvestısııa­ tartýǵa múmkindik berdi. In­ves­tısııanyń jalpy kólemi 410 mlrd teńgeni qurady.

Altynshy baǵyt – halyqaralyq qarjy uıymdarymen jobalardy qosa qarjylandyrý aıasynda 2017 jyly Halyqaralyq qar­jy uıymdarymen áriptestik tý­raly negizdemelik kelisim sheń­berinde mýnısıpaldy jylý jáne sýmen jabdyqtaý júıelerin jań­ǵyrtýǵa, shaǵyn jáne orta bıznesti damytýǵa, ónimdi ınnovasııalardy yntalandyrýǵa, jumys daǵdylaryn damytý jáne jumys oryndaryn qurýǵa, sýarý jáne drenaj júıelerin jetildirýge baǵyttalǵan 15 jobany birlesip qarjylandyrýǵa qarajat bólin­gen. 2017 jyly kelisimder ratıfı­kasııalanyp jáne jalpy somasy 366,4 mln AQSh dollaryn quraıtyn eki úkimettik nesıe jobasy iske qosyldy, onyń ishinde halyqaralyq qarjy uıymdarynan tartylǵan qarajat 320 mln AQSh dollaryn qurady. Budan ózge, memlekettik kepildik berý arqyly júzege asyrylatyn eki jobany iske asyrý bastaldy.

Aıtqandaı, memlekettik baǵ­dar­lamany iske asyrýǵa barlyǵy 75 myń adam tartylǵan jáne paı­dalanylǵan otandyq jol-qurylys materıaldarynyń úlesi 93 paıyzdy quraǵan.

Dinı ekstremızm men terrorızmge qarsy is-qımyl kúsheıdi

Úkimet otyrysynda qaralǵan kelesi másele – Qazaqstanda 2013-2017 jyldarǵa arnalǵan dinı ekstremızm men terrorızmge qarsy is-qımyl jónindegi memlekettik baǵdarlamanyń oryndalý barysy jáne 2018-2022 jyldarǵa arnalǵan memlekettik baǵdarlama jobasy. Bul rette Ulttyq qaýipsizdik komıteti tóraǵasynyń orynbasary, general-maıor Nurǵalı Bilisbekov Memleket basshysynyń tapsyrmasyna sáıkes daıyndalǵan 2018-2022 jyldarǵa arnalǵan baǵdarlamanyń maqsaty dinı ekstremızm kórinisterin eskertý jáne terrorızm qaýpin boldyrmaý arqyly adamnyń, qoǵamnyń jáne memlekettiń qaýipsizdigin qam­ta­masyz etý ekenin atap ótti. Jo­bany ázirleý kezinde 2013-2017 jyldarǵa arnalǵan Memleket­tik baǵdarlamany iske asyrý nátı­je­leriniń taldaý derekteri, ekstre­mızm men terrorızm qaýpin týdyratyn jaǵdaılar men faktor­lar­dyń taldaýy, halyqaralyq ozyq tájirıbe, memlekettik organ­dar­dyń, ÚEU-nyń jáne qoǵamdyq bir­­les­­tikterdiń usynystary eske­rilgen.

2013 jyldan bastap elimizde dinı ekstremızm men terrorızm ıdeologııasyn taratýdyń sebepteri men jaǵdaılaryn joıý jáne ataýly aqparattyq túsindirý jumystaryn uıymdastyrý jó­ninde 202 komıssııa jumys isteıdi.

Málimdelgendeı, atalǵan ba­ǵyt­ta jalpy sany 8,1 mln-nan astam adam qamtylǵan 96,6 myńnan astam shara ótkizilgen. Atqarylǵan jumys nátıjesinde 755 «jıhadshy» qalypty jolǵa kóshirilgen. Da­ıyn­dyq jumystarynyń bastap­qy kezeńinde 38 terrorlyq sıpat­taǵy zorlyq-zombylyq ekstremıs­­tik naýqandarynyń iske asy­ry­lýyna jol berilmegen. Shetel­de kúdikti dinı bilim berý meke­me­­lerinen 384 stýdent elge qaı­ta­rylǵan.

Atalǵan máselege qatysty Ulttyq ekonomıka mınıstri Tı­mýr Súleımenov te sóz sóıledi. Onyń aıtýynsha, memlekettik josparlaý júıesi qujattarynyń talaptaryna sáıkes Dinı ekstremızm men terrorızmge qarsy is-qımyl jónindegi 2013-2017 jyldarǵa arnalǵan memlekettik baǵdarlamanyń iske asyrylýynyń tıimdiligine baǵalaý júrgizildi. Baǵalaý 4 krıterıı bo­ıynsha júr­gi­zildi. Máselen nysanaly ındıka­torlar men nátıjeler kórset­kish­terine qol jetkizý dárejesi, is-sharalardy oryndaý tolyqtyǵy, bıýdjet qarajatyn ıgerý deńgeıi, nysanaly ındıkatorlardy jáne nátıjeler kórsetkishterin josparlaý.

Ulttyq ekonomıka mınıs­tr­liginiń málimetine sáıkes, bıýdjet qarajatyn ıgerý deńgeıi 95,8 paıyzdy quraǵan. «Nysanaly ındıkatorlardy jáne nátıjeler kórsetkishterin josparlaý sapasy boıynsha memlekettik baǵdarlama qabyldanǵan sátten bastap ındıkatorlar men kórsetkishterdiń mánderi, is-sharalardy oryndaý merzimderi túzetilmegenin atap ótemin», dedi T.Súleımenov.

Talqylaý nátıjesinde 2018-2022 jyldarǵa arnalǵan mem­le­kettik baǵdarlama jobasy maqul­dandy.

Dınara BITIK,

«Egemen Qazaqstan»