Batys Qazaqstan oblysynda 180 áıel basshy qyzmette. Olardyń 54-i – sýdıa, 50-i – oblystyq basqarma, aýdandyq jáne qalalyq bólim basshylary, al 15-i – aýyldyq okrýg ákimi nemese orynbasary.
Budan bólek, áleýmettik salanyń negizgi júgi de názik jynystylardyń ıyǵynda desek bolady. О́ńirdegi bilim men densaýlyq saqtaý salasynda tıisinshe 17 jáne 8,5 myń áıel adam jumys istep júr. Tipti qorǵanys salasynda da 127 áıel oqaly kıim kıip, áskerı tártipke baǵynǵan. Al oblystaǵy 48 myń kásipkerlik nysannyń teń jartysyna jýyǵyn da bıznes-ledıler basqaryp otyr eken.
Halyqaralyq áıelder kúni qarsańynda Oral qalasyndaǵy Dostyq úıinde ótken saltanatty sharada Batys Qazaqstan oblysynyń ákimi Altaı Kólginov óńirdiń damýyna súbeli úles qosqan zeınetker analarmen, ár salada jemisti eńbek etip júrgen qyz-kelinshektermen kezdesip, olardy kóktem merekesimen quttyqtady.
Jıynda sóz alǵan aqyn Aqushtap Baqtygereeva, eńbek ardageri Roza Kýjekova, QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi komıssııa tóraıymynyń orynbasary Elena Tarasenko, «Gıdroprıbor» AQ ınjener-konstrýktory Tatıana Ponomareva, «PMK-117» JShS dırektory Olga Popova jáne basqalar sóz alyp, elimizde jáne oblysta atqarylyp jatqan ıgi ister týraly, qoǵamdaǵy áıel anaǵa jasalyp jatqan memleket qoldaýy jaıly aıtyp, alǵys bildirdi. Belgili aıtys aqyny Jansaıa Mýsınanyń tilegine oraı Altaı Kólginov Oral qalasynda respýblıkalyq aıtys uıymdastyrýǵa ýáde berdi. Kesh sońy konsertpen jalǵasty.
Qazbek QUTTYMURATULY, «Egemen Qazaqstan»