Jambyl oblystyq tarıhı-ólketaný mýzeıiniń kórme zalynda sýretshi Tatıana Shelýdchenkovanyń «О́mir. Mahabbat. Shabyt!» atty shyǵarmashylyq kórmesi ashyldy.
Atalǵan kórmege sýretshiniń «Kóbelek», «Kógershinder kózindegi muń», «Kóktem», «Garmonııa» sekildi 18 jyldan beri jınaqtalǵan týyndylary qoıyldy. Bul kúni mýzeı kórmesine tarazdyq turǵyndar kóptep jınalyp, shyǵarmashylyq ıesiniń shynaıy shabytpen órilgen shyǵarmalaryna kýá boldy.
Tatıana Shelýdchenkova Áýlıeata óńirine akrıl tehnıkasyn qoldaný arqyly áınek betine sýret salý ónerin damytqan týyndyger retinde tanymal. Osydan on úsh jyl buryn alǵashqy shyǵarmashylyq kórmesin kópshilikke usynǵan sýretshiniń túrli tehnıkanyń kómegimen jasalǵan týyndylary kúni búginge deıin kópshilik nazarynda. Sodan beri tynymsyz shyǵarmashylyq izdeniste kele jatqan Tatıananyń bul jolǵy kórmesi de kelýshilerdiń sýret ónerine degen qyzyǵýshylyǵyn oıatty. Sýretshiniń «О́mir. Mahabbat. Shabyt!» atty kórmesiniń ashylý saltanatynda oblystyq tarıhı-ólketaný mýzeıi dırektorynyń orynbasary Ǵalııa Álimjanova Tatıana talantynyń qyr-syryna toqtalyp, onyń sýret ónerinde ózindik qoltańbasy qalyptasqanyn jetkizdi. Sondaı-aq belgili sýretshi Aıdarhan Sıhaev áriptesiniń kásibı sheberliginiń joǵary ekenin aıtyp, týyndylaryna oń baǵa berdi.
О́z sózinde Tatıana Shelýdchenkova shyǵarmashylyǵyn baǵalap, talantyn tanyp kórmege kelgen kópshilikke júrekjardy lebizin bildirip, sýret ónerinde ári qaraı da eńbek ete beretinin, josparlarynyń da jetkilikti ekenin jetkizdi. Rasynda da tylsym álemnen syr tartyp, jumbaq kúıde jan túkpirinde ǵajaıyp bir sezimdi oıatatyn sýretshiniń shynaıy shyǵarmashylyǵy kópshiliktiń yqylasyna ıe boldy.
Hamıt ESAMAN, «Egemen Qazaqstan»
Jambyl oblysy