Májiliste Palata Spıkeri Nurlan Nyǵmatýlın men Koreıa Respýblıkasynyń Ulttyq Assambleıasynyń tóraǵasy Chýng Se Gıýn kezdesti. Bul týraly Parlament Májilisiniń baspasóz qyzmeti habarlady.
Taraptar eki el arasyndaǵy saýda-ekonomıkalyq, halyqaralyq, mádenı-gýmanıtarlyq, sonymen birge, parlamentaralyq yntymaqtastyqtyń ózekti suraqtaryn talqylady.
Májilis Tóraǵasy Koreıa Respýblıkasynyń Shyǵys Azııadaǵy mańyzdy strategııalyq áriptesi ekenin aıtty.
Kezdesýde Qazaqstan Prezıdentiniń damyǵan el qataryna kirý jolyndaǵy Strategııalyq mańyzdy bastamalaryn sóz etken, N. Nyǵmatýlın olardy zańnamalyq turǵydan qamtamasyz etý jaıyna aıryqsha nazar aýdardy.
Májilis Sptkeriniń pikirinshe, Koreıa |Respýblıkasy sıfrlyq tehnologııa, ınnovasııalyq damý salasynda álemdik kóshbasshylardyń biri. Osy rette atalǵan el Parlamentiniń ekonomıkany sıfrlandyrý, kólik jáne logıstıka, densaýlyq pen bilim salalarynda ınnovasııalyq tehnologııany engizýdi zańnamalyq turǵydan qamtamasyz etý tájirıbeleri zor qyzyǵýshylyq týdyrady.
Osy rette mártebeli meıman Qazaqstannyń eń damyǵan 30 eldiń qataryna kirý maqsatyn jaqsy biletinin jáne Qazaqstan Prezıdentiniń teńdessiz kóshbasshylyǵyn, elimizdiń joǵary damý qarqynyn, baı resýrstaryn sóz ete kelip, Qazaqstannyń ol maqsatqa jetetinine erekshe senim bildirdi. Jáne osy úlken jolda Koreıa Qazaqstannnyń eń jaqyn áriptesteriniń biri bolyp qalatynyn atap ótti.
Sondaı-aq, Elbasynyń halyqaralyq deńgeıdegi salıqaly saıasatyna aıryqsha kóńil bólip, Qazaqstan Prezıdenti ıadrolyq qarýsyzdaný baǵytyndaǵy batyl ári naqty qadamdarynyń arqasynda úlgi bolyp kele jatqanyna zor rızashylyǵyn bildirdi.
Kezdesý barysynda Parlament ókilderi Qazaqstan Respýblıkasy Parlamenti Májilisi men Koreıa Respýblıkasy Ulttyq Assambleıasy arasynda yntymaqtastyq týraly Kelisimge qol qoıdy.
Alǵash ret jasalyp otyrǵan bul Kelisim, bizdiń elderimizdiń Strategııalyq yqpaldastyǵyn zańdyq turǵydan qoldaýǵa múmkindik berýmen qatar, parlamentter arasyndaǵy zańnamalyq tájirıbeni odan ári yntalandyrýǵa, halyqaralyq máseleler tóńireginde ortaq ustanymdy kúsheıtýge zor yqpal etetin bolady.
Osy oraıda Nurlan Nyǵmatýlın jáne Chýng Se Gıýn beıindi komıtetter men yntymaqtastyq jónindegi toptar arqyly jıi is-qımyl almasyp, parlamentter áriptestigin jańa deńgeıge kóterýdiń mańyzdylyǵyna toqtaldy.
Júzdesý barysynda Eýrazııa elderi parlamentteri spıkerleriniń Seýl jınalysy da nazardan tys qalmady.
Taraptar, búginde bul forýmnyń kún tártibindegi mańyzdy suraqtardy talqylaýdyń qosymsha únqatysý alańyna aınalǵanyn aıtyp, 2019 jyly atalǵan basqosýdyń tórtinshi jınalysyn uıymdastyrý qajettiligine kóńil bóldi.