Senatta «Áleýmettik-kásipkerlik korporasııalar – óńirlik damý ınstıtýty» taqyryby boıynsha dóńgelek ústel boldy, dep habarlady Parlament Senatynyń Baspasóz qyzmeti.
Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaev sharany asha kelip, Memleket basshysy «Qazaqstannyń álemdegi básekege barynsha qabiletti 50 eldiń qataryna kirý strategııasy» Joldaýynda aımaq ortalyqtarynda ekonomıkalyq is-qımyldy údetýge, sondaı-aq aımaqtardy tıimdi ekonomıkalyq salalarǵa mamandandyrýdy qalyptastyrýǵa baǵyttalǵan qazirgi zamandaǵy aýmaqtyq damý strategııasyn ázirleý qajettigi týraly mindet alǵa qoıǵanyn atap ótti.
Asqar Beısenbaev qazirgi kezde Áleýmettik-kásipkerlik korporasııalar bıznesti qoldaý jáne aımaqtyq damýdyń ósý ortalyqtary retinde ekonomıkalyq qarqyndy yntalandyrýda qajetti ınstıtýttar retinde qajet bolyp otyrǵanyn, ÁKK aımaqtaǵy kásipkerlerdiń bastamalaryna qoldaý bildire otyryp, aımaqtaǵy bıznestiń iskerlik belsendiligin arttyrýy tıis ekenin atap ótti. ÁKK jumysynyń tıimdiligin arttyrý búgingi tańda aımaqtardy damytýdaǵy negizgi basymdyqtardyń biri bolyp tabylady.
Senator Álimjan Qurtaev jeke qarjynyń jetispeýshiligi, kommersııalyq jáne kommersııalyq emes mindetterdiń aralasyp ketýin, kóptegen ÁKK-niń shyǵynǵa ushyrap jatqanyn, jobalar aýqymy aıasynyń keńdigi men ońtaıly emestigi jáne basqa da ÁKK qyzmetindegi ózekti máselelerdi atap kórsetti.
Ulttyq ekonomıka mınıstriniń orynbasary Serik Jumanǵarın áleýmettik-kásipkerlik korporasııalar qyzmetindegi negizgi kórsetkishterdi dóńgelek ústelge qatysýshylarǵa tanystyrdy. Onyń aıtýynsha, búgingi tańda oblystarda, Astana men Almaty qalalarynda 16 áleýmettik-kásipkerlik korporasııalar jumys istep keledi, olardyń 85 enshiles ári táýeldi kásiporny bar, olarda 102 ınvestısııalyq jobalar júzege asýda. 2016 jyldyń qorytyndysy boıynsha barlyq áleýmettik-kásipkerlik korporasııalardyń jalpy kirisi 31,5 mıllıard teńgeni, shyǵystary 31,8 mıllıard teńgeni qurady.
Investısııalar jáne damý mınıstriniń orynbasary Arystan Qabykenov Qazaqstannyń 8 aýmaǵynda (Ońtústik Qazaqstan, Qyzylorda, Almaty, Mańǵystaý, Atyraý, Aqtóbe, Soltústik Qazaqstan, Shyǵys Qazaqstan oblystarynda) 23 ındýstrııalyq aımaqtar jumys isteıtinin aıtty. 136 mıllıard teńge (25,6 paıyzy sheteldikterdiń qatysýymen) salynǵan 127 joba iske qosyldy, 186 joba júzege asý kezeńinde, 8 myń jumys orny ashyldy, óndiris kólemi 160 mıllıardtan astam teńgeni qurady, 14 mıllıardtan astam teńge salyq túrinde qaıtaryldy. Bul rette barlyq ındýstrııalyq aımaqtardan ınfraqurylymnyń qurylysyna arnalǵan bıýdjet shyǵyndary 61 mıllıardtan astam teńgeni qurady. Sóıtip, ınfraqurylymǵa salynǵan bıýdjettiń 1 teńgesine jeke ınvestısııanyń 2,2 teńgesi tartyldy.
Aýyl sharýashylyǵy mınıstriniń orynbasary Arman Evnıev azyq-túlik taýarlarynyń turaqtandyrýshy qorlaryn qalyptastyrý men paıdalanýda mınıstrlik áleýmettik-kásipkerlik korporasııalarmen ózara tyǵyz áreket etinin atap ótti.
«Astana» áleýmettik-kásipkerlik korporasııasynyń jetekshisi Nurlan Jaqypovtyń derekteri boıynsha, «1000 oryn – kóshe saýdasy» baǵdarlamasy aıasynda 800 mıllıonnan astam jeke ınvestısııa tartylǵan, astanada myńnan astam jańa jumys oryndary ashylǵany aıtyldy.
Sóz alǵan «Shymkent» áleýmettik-kásipkerlik korporasııasynyń basshysy Aıtmuhamed Aldajarov oblysta 11 ındýstrııalyq aımaq qurylǵanyn, onda 156 mıllıard teńgeniń 172 jobasy júzege asqanyn aıtty.
Parlament Senatynyń depýtattary dóńgelek ústel otyrysy barysynda áleýmettik-kásipkerlik korporasııalarynyń tıimdi damýyna bóget bolyp otyrǵan ózekti máselelerdi sheshý joldaryn talqylady. Zańnamalyq jáne normatıvtik-quqyqtyq bazany jetildirý, qarjylandyrýdyń qosymsha kózderin tabý, jer bólý merzimderin qysqartý jáne basqa da máseleler aıtyldy.
Dóńgelek ústel otyrysynyń qorytyndysy boıynsha usynystar ázirlenip, olar elimizdiń Úkimetine, jergilikti atqarýshy organdarǵa jáne basqa da múddeli uıymdarǵa jiberiledi jáne budan bylaıǵy zań shyǵarý jumystary barysynda Senat depýtattary eskeretin boldy.