Qazirgi tańda elimizdiń keıbir óńirlerinde kóktemgi sý tasqynynyń aldyn alý úshin qaýyrt sharalar qolǵa alynýda. Bul rette Aqmola oblysynda da qyzý daıyndyq jumystary júrgizilýde. Buǵan kóz jetkizý úshin oblystyq tótenshe jaǵdaılar departamenti ótken aptada sý qaýpi basym Atbasar aýdanyndaǵy jaǵdaımen jiti tanystyrý úshin buqaralyq aqparat quraldary ókilderine baspasóz týryn ótkizgen bolatyn. Bul joly jýrnalıster Zerendi men Sandyqtaý aýdandaryndaǵy jaǵdaımen tanysty.
Tótenshe jaǵdaılar departamentiniń bastyǵy, azamattyq qorǵanys polkovnıgi Alekseı Sovetov bastaǵan top Zerendi jáne Sandyqtaý aýdanyna jasalǵan baspasóz týry barysynda jergilikti ákimdikterdiń jumys barysyn qalaı jolǵa qoıǵanymen jáne birlese áreket etý jaıymen jan-jaqty tanystyrdy. Atbasarǵa qaraǵanda bul eki aýdanda sý tasqynynyń qaýpi azdaý. Sonda da tasqynnyń aldyn alý daıyndyǵynyń joǵary ekendigine kóz jetkizdik. Qar kúrt erip ketpese, tótenshe jaǵdaı bola qoımas degen úmit bar. Zerendi aýdanynda 4 gıdrotehnıkalyq qurylysqa jáne Sandyqtaý aýdanynda 1 nysanǵa jan-jaqty tekserý jumystary júrgizilip otyr. Sonyń barysynda erigen qar sýlarynyń aǵý baǵyttary men bógetterdiń sýdy ustap turý múmkindikteri ekshelip, Sandyqtaý aýdanynyń apattyq-qutqarý bólimshesiniń daıyndyǵy taǵy bir pysyqtaldy.
Sandyqtaý aýdany aýmaǵyndaǵy qaýipti sanalatyn Maksımovka bógetiniń qazirgi tehnıkalyq jaǵdaıy qalypty.
Zerendi aýdanynda qalyptasqan jaǵdaıdy aıtsaq, qazirgi tańda mundaǵy Aıdabol, Alekseevka, Ivanovskaıa jáne Báıterek sııaqty sý bógetteriniń tehnıkalyq jaǵdaıy da oıdaǵydaı dese-di. Mysaly Aıdabol aýylyndaǵy bógetke úsh ózen kelip quıady. Atalǵan eldi mekenniń soltústik-shyǵysynda ornalasqan bul ózender negizgi bastaýyn osy jerden alady. Negizinen bóget 1977 jyly paıdalanýǵa berilse, 2016 jyly bógettiń korpýsy 2.5h2.5 m ólshemdi sý ótkizetin birlikpen jabdyqtalǵandyǵyn qaperge sala ketken artyq etpes. Sý qoımasynda qazirgi tańda shamamen 600 myń tekshe metr sý jınalsa, jazǵy kezeńde 150-200 myń tekshe metrge deıin tómendeıdi eken. Jalpy sý qoımasynyń eń joǵarǵy ótkizý qabileti mınýtyna 152 tekshe metr kórinedi. Sol sııaqty Alekseevka, Ivanovskaıa jáne Báıterek bógetteriniń jaǵdaıy da qanaǵattanarlyq ekendigine kóz jetkizip qaıttyq. Taǵy bir belgilisi, bul bógetterde sý aǵyzý júıesi qolmen rettelmeıdi. Barlyq qubyrlar ashyq qaldyrylǵan. Eger sý deńgeıi kóterilgen jaǵdaıda sý álgi qubyrlar arqyly syrtqa aǵyp ketedi.
Asqar TURAPBAIULY, «Egemen Qazaqstan»
Aqmola oblysy