Bıylǵy birinshi toqsanda bıýdjet kirisi artyp, ınflıasııa qarqyny birshama baıaýlaǵany baıqaldy. Sarapshylar muny QQS mólsherlemesiniń ózgerýinen keıingi qysqamerzimdi baǵa ósiminiń áseri birtindep basylǵanymen baılanystyrady. Byltyrǵy jyldyń sońy men bıylǵy qańtar-aqpan aılarynda bul faktor ekonomıkaǵa sińip, qazir ınflıasııaǵa aıtarlyqtaı yqpal ete qoımady.
Jedel derekterge sáıkes bıylǵy 1 toqsandaǵy memlekettik bıýdjet kirisiniń atqarylýy (transfertterdi eseptemegende) 104,4%-dy qurady. Jospardaǵy 6 176,2 mlrd teńgeniń ornyna bıýdjetke 6 444,9 mlrd teńge túsken. Asyra oryndaý – 268,7 mlrd teńge.
О́tken jylǵy uqsas kezeńmen salystyrǵanda memlekettik bıýdjet kirisi 930,6 mlrd teńgege nemese 16,9% ulǵaıdy. Kiris josparynyń asyra oryndalýy respýblıkalyqta, jergilikti bıýdjetterde de tirkeldi. Aıta ketý kerek, bıylǵa arnalǵan salyq túsimderinen respýblıkalyq bıýdjettiń kirisi 18,886 trln teńge somasynda josparlanyp otyr. Bul byltyrǵy naqty túsimnen 4,4 trln teńge joǵary.
Atap aıtqanda, respýblıkalyq bıýdjettiń kirisi 101,8% oryndaldy. Jospardaǵy 4 085,6 mlrd teńgeniń ornyna 4 159,4 mlrd teńge tústi. О́tken jylǵy ósim – 26,1%. Bul kóbine álemdik naryqtardaǵy elimizdiń negizgi eksporttyq taýarlaryna baǵanyń ósýine, byltyrǵy 4 toqsanda EShF júıesinde tirkelgen taýarlar men qyzmetterdi ótkizý kóleminiń artýyna, sondaı-aq salyqtyq, kedendik ákimshilendirý nátıjesine baılanysty.
Respýblıkalyq bıýdjet kirisiniń negizgi bóligin quraıtyn salyqtyq túsimder (98%) 101,6% oryndaldy. Jospardaǵy 4 012,8 mlrd teńgeniń ornyna 4 077,6 mlrd teńge tústi. Byltyrǵy sáıkes kezeńmen salystyrǵanda ósim 31,5%-dy qurady. Bul rette byltyrǵy IV toqsanǵa (2026 jylǵy 25 aqpanǵa deıin) QQS tóleý merzimi bıylǵy qańtar-naýryzǵa kelgenin eskerý qajet. Tıisinshe, QQS-tyń salyq mindettemeleri 12% mólsherlemege sáıkes júrgizildi.
Byltyrǵy uqsas kezeńmen salystyrǵanda ósim ımporttalatyn taýarlarǵa KTS (+16,9%), QQS (16% mólsherlememen eseptelgen) (+24,2%), paıdaly qazbalardy óndirýge salynatyn salyq (+35,7%) sııaqty iri salyqtar esebinen qamtamasyz etildi. Jergilikti bıýdjetterdiń kirisi 109,3% oryndaldy. Jospardaǵy 2 090,6 mlrd teńgeniń ornyna 2 285,5 mlrd teńge tústi. О́tken jylǵy ósim – 3,1% (+68,8 mlrd teńge).
Jyl basynan beri ózin-ózi jumyspen qamtyǵandarǵa arnalǵan arnaıy salyq rejiminde 392 myń jeke tulǵa tirkelgen. QQS tóleýshiler sany 10 myń sýbektige artty.
Birinshi toqsannyń qorytyndysynda ınflıasııany tómendetýdiń turaqty úrdisi saqtalyp otyr. Naýryzda ınflıasııa qarqyny qańtar-aqpandaǵy 1,0-1,1%-ben salystyrǵanda 0,6%-ǵa deıin baıaýlady. Ulttyq ekonomıka mınıstrliginiń boljaýynsha, 2027 jyldyń basynda ınflıasııanyń bir mándi deńgeıine shyǵý yqtımaldyǵy joǵary.