Parlament «Qazaqstan Respýblıkasy astanasynyń mártebesi týraly» Konstıtýsııalyq zańdy ekinshi oqylymda qabyldady. Qujat elordanyń quqyqtyq mártebesin bekitip, memlekettik basqarýdy jetildirýge jáne jaıly, qaýipsiz orta jasaýǵa baǵyttalǵan, dep habarlaıdy Egemen.kz.
Zańda astananyń respýblıkanyń saıası, ákimshilik, mádenı jáne ekonomıkalyq ortalyǵy retindegi rólin nyǵaıtý, ınfraqurylymdyq jáne áleýmettik-ekonomıkalyq damýyn kúsheıtý, sondaı-aq halyqaralyq deńgeıdegi ortalyq retindegi áleýetin arttyrý kózdelgen.
Qujatqa sáıkes, elorda máslıhaty men ákimdiginiń ókilettikteri naqty aıqyndaldy. Máslıhat sheteldik jergilikti ókildi organdarmen baılanys ornatý, qala qurylysy qujattaryn bekitý jáne jer telimderin ıelikten shyǵarý sııaqty máselelerdi qaraıdy.
Al ákimdikke qala qurylysy jobalaryn baqylaý, apattyq turǵyn úılerdi buzýdy uıymdastyrý, qalanyń arhıtektýralyq kelbetin qalyptastyrý jáne jol qozǵalysyn uıymdastyrý shemalaryn ázirleý sııaqty mindetter júkteledi.
Sonymen qatar, qala aýmaǵy men qala mańy aımaǵyn damytý, ınfraqurylymdy jetildirý jáne ormandy-saıabaq aımaqtarynyń ekologııalyq mártebesin aıqyndaý tártibi de zańmen retteledi.
Sondaı-aq, Parlament Palatalarynyń birlesken otyrysynda «Prezıdent týraly» Konstıtýsııalyq zań qabyldanyp, Quryltaıdyń ókilettigi men depýtat mártebesi zańmen bekitildi.