Parlament «Qazaqstan Respýblıkasynyń zańnamasyn Qazaqstan Respýblıkasynyń Konstıtýsııasyna sáıkes keltirý, saılaý jáne prokýratýra týraly zańnamasyn jetildirý máseleleri boıynsha Qazaqstan Respýblıkasynyń keıbir konstıtýsııalyq zańdaryna ózgerister men tolyqtyrýlar engizý týraly» Konstıtýsııalyq zańdy ekinshi oqylymda qabyldady. Qujat ótken saılaý naýqandary barysynda anyqtalǵan problemalyq máselelerdi eskere otyryp ázirlengen, dep habarlaıdy Egemen.kz.
Túzetýler ákimshilik-aýmaqtyq birlikter qaıta qurylǵan kezde saılaý komıssııalarynyń ókilettikterin saqtaý jáne aýysý máselelerin retteýdi qarastyrady. Sondaı-aq aýmaqtyq komıssııa músheleriniń bala kútimine baılanysty demalysy nemese oqý demalysy kezeńinde olardyń ókilettikterin ýaqytsha toqtata turý jáne ornyna ýaqytsha adam taǵaıyndaý tetigi engiziledi.
Budan bólek, ákim laýazymyna úmitkerlerdiń jınaǵan daýystary teń bolǵan jaǵdaıda qaıta daýys berýdi ótkizý tártibi retteledi. Sonymen birge kandıdattardy usyný prosesi júıelenedi: bir adam bir ýaqytta máslıhat depýtattyǵyna da, ákimdikke de túse almaıdy, sondaı-aq birden birneshe saılaý okrýgi boıynsha ákimdikke kandıdat retinde usynyla almaıdy.
Parlament «Prezıdent týraly» Konstıtýsııalyq zańdy ekinshi oqylymda qabyldady
Aqparattyq alańdarda saılaý aldyndaǵy úgit-nasıhat júrgizgen máselelerine erekshe nazar aýdaryldy. Kandıdat úgit materıaldaryn óziniń ınternet-resýrsynda, sondaı-aq onlaın-platformalardaǵy paraqshalarynda jarııalaı alady. Bul rette kandıdattar men saıası partııalarǵa saılaý qorlarynan tys qarjy tartýǵa tyıym salynady.
Daýys berý, daýystardy sanaý nemese qorytyndyny anyqtaý barysynda Konstıtýsııalyq zań normalary buzylǵan jaǵdaıda, jekelegen saılaý ýchaskelerinde nemese ákimshilik-aýmaqtyq birlikterde saılaýdy jaramsyz dep taný boıynsha Ortalyq jáne aýmaqtyq saılaý komıssııalarynyń quzyreti tolyqtyryldy.
Budan bólek, endi azamattardyń konstıtýsııalyq quqyqtarynyń iske asyrylýyn qamtamasyz etý úshin úzdiksiz óndiristik sıkli bar uıymdarda, sondaı-aq vahtalyq ádispen jumys isteıtin oryndarda saılaý ýchaskeleri qurylýy múmkin.
Sondaı-aq daýys berý kúni toltyrylǵan bıýlletendi fotosýretke jáne (nemese) vıdeoǵa túsirýge jáne taratýǵa tyıym salý usynylady, óıtkeni bul saılaý aldyndaǵy úgit-nasıhat júrgizýmen teń dep esepteledi.
Quryltaıdyń ókilettigi men depýtat mártebesi zańmen bekitildi
Túzetýlerdiń taǵy bir blogy konstıtýsııalyq normalardy iske asyrý maqsatynda usynyldy. Bul rette áńgime Quryltaıdy qurý, proporsıonaldy júıege kóshýge baılanysty saılaý zańnamasyn jetildirý, jekelegen adamdardy laýazymǵa taǵaıyndaý jáne bosatý máseleleri boıynsha Prezıdent pen Quryltaı arasynda ókilettikterdi qaıta bólý, jalpyhalyqtyq referendým ótkizý jáne basqa da baǵyttar týraly bolyp otyr.