Mańǵystaý oblysyndaǵy Túpqaraǵan aýdanynda ornalasqan Qapam ata jartas meshitiniń syrtqy kelbeti zańsyz ózgertilgen. Belgisiz bireýler tarıhı nysanǵa plastık tereze ornatyp, kirpish qalap tastaǵan. Qazir jaýaptylardy anyqtaý jumysy júrip jatyr, dep jazady Egemen.kz.
Lada.kz saıtynyń jazýynsha, Qapam ata jartas meshiti Taýshyq aýylynan soltústik-batysqa qaraı 22 shaqyrym jerde ornalasqan. XIX ǵasyrǵa jatatyn nysan óńirdegi sopylyq jáne dástúrli dinı tájirıbemen baılanysty jerasty ǵıbadat orny sanalady. Meshit jumsaq taý jynysyn oıyp jasaý arqyly turǵyzylǵan.
2025 jylǵy 2 shildede nysanǵa tarıhı-mádenı saraptama júrgizilip, onyń qundy mura ekeni rastalǵan. Sol kezde meshit bastapqy qalpynda bolǵan. Alaıda arada jarty jyl ótkende nysannyń kelbeti túbegeıli ózgergeni anyqtalǵan.
3 jylǵa sottalýy múmkin: IIM tarıhı eskertkishterdi búldirgenderge qatań eskertý jasady
Belgisiz adamdar jartas qýystarynyń birin kirpishpen jaýyp, plastık tereze men esik ornatqan. Vandalızm deregi 2025 jyldyń jeltoqsanynda belgili boldy. Mádenıet basqarmasy tarıhı eskertkishke eleýli zalal kelgenin málimdedi.
Vandalızm nemese agressııa anatomııasy
Osyǵan baılanysty Túpqaraǵan aýdany ákimdigi men polısııa bólimine resmı hat joldanǵan. Ázirge nysan burynǵy qalpyna keltirilmegen. Zań boıynsha qalpyna keltirý jumystary eskertkishti búldirgen adamnyń esebinen júrgizilýi tıis.
Eger kúdikti anyqtalsa, oǵan Ákimshilik quqyq buzýshylyq týraly kodekstiń 145-baby boıynsha 10 AEK-ten 200 AEK-ke deıin aıyppul salynýy múmkin. Bul – 43 250 teńgeden 865 000 teńgege deıingi soma.
Eske salaıyq, Mańǵystaý oblysyndaǵy Ybyqty-Saı shatqalyna oıyp jazý qaldyrǵan sheneýnik qyzmetinen ketken.