«Shyǵys Qazaqstan oblysyndaǵy sý tasqynynan zardap shekken eldi meken turǵyndaryn qoldaý maqsatynda Batys Qazaqstan oblysy ákimdigi men ózge de memlekettik qyzmetkerler bir kúndik jalaqylaryn aýdaratyn boldy» dep habarlaıdy Batys Qazaqstan oblystyq ákimdiginiń baspasóz qyzmeti.
Aıta keteıik, búginde Shyǵys Qazaqstan oblysynyń Aıagóz, Glýbokoe aýdandarynyń keıbir eldi mekenderin sý basyp, Semeı qalasynda Ertis ózeniniń deńgeıi kóterilýine baılanysty qaýip seıilmeı tur.
Alapat sý tasqynynyń zardabyn batysqazaqstandyqtar 2011 jyly bastan ótkergen edi. Bıyl da óńirdiń soltústik aýdandarynda tasqyn qaýpi bar. Oblys ákimi Altaı Kólginov 25 naýryzda shtabtyń shuǵyl jıynyn ótkizip, kúsheıtilgen rejimdegi jumysqa kóshkenin málimdegen bolatyn.
Qazbek QUTTYMURATULY, «Egemen Qazaqstan»
Batys Qazaqstan oblysy