Semeıde tótenshe jaǵdaı jarııalanyp, tasqyn sý saldarynan bolǵan shyǵyndy anyqtaıtyn arnaıy komıssııa jumysyn bastady. Búgin taǵy da jarylys jumystary júredi dep josparlanýda.
Keshe jarylǵysh zattyń barlyǵy qoldanyldy. Túni boıy О́skemen qalasynan qosymsha jarylǵyshtar ákelinbek. Osynyń barlyǵy da muzdy oıyp, sýdy erkin ári durys baǵytta jiberý úshin jasalyp jatqan sharalar. Bas kezinde qalanyń bir shetindegi Túıemoınaq aralynyń úıleri sýda qalsa, odan keıin Mırnyı, Shyǵys kentteriniń kóshelerine de sý jaıylyp ketti. Sýdyń deńgeıin tómendetýdiń barlyq sharasyn jasaýdy maqsat qyp alǵan qala basshylyǵy muzdy jarýdy áli de durystap qarastyrmaq.
- Muzdy jardyq, sóıtip Ertisti erterek júrgizýdi jobaladyq, - dedi qala ákimi Ermak Sálimov, - biraq, ókinishke qaraı, muzdyń úlken kesegi teri zaýyty aýmaǵynda turaqtap qalǵan. Mine, osy sebepten qalanyń Zaton aýmaǵy da sýda qalyp otyr. Sóıtip, bul aǵys boıyndaǵy Bobrovka mekenine de jetti. Zatonda sonymen 75 úı sý astynda qalyp otyr. Bobrovkada 150 saıajaı osy halge tústi. 235 adam bul jerden kóshirildi. Biraq, adamdar jaǵdaıdyń aýyr ekenin uǵa almaı, úılerin tastap ketkisi joq. Desek te, sýdyń astynda qalmas úshin biz avtobýstardy daıyndap qoıdyq. Jergilikti qonaq úılerde oryndar daıyn tur.
Semeı qalasynyń ákimi Ermak Sálimov tikushaq arqyly Ertistiń qalyń muz qursaýlanǵan tustaryn sholyp ótken. Bir emes, eki ret bıiktikten shola qaraǵan kezde Ertistiń aǵysy erkin ketý úshin qalanyń syrt emes, ishki tusynda muzdy jarý qajettigi anyqtalypty. Bul teri zaýytynyń janyndaǵy «Parýs» dúkeniniń tusy. Sonymen bul tustaǵy muz óte qalyń bolǵandyqtan, az qýaty bar jarylǵysh zat bul muzdy oıa almas edi, deıdi qala basshysy, sondyqtan da, qýaty kúshti jarylǵyshty iske qosqan. Qalyńdyǵy 120 sm muz jarylǵan kezde qasyndaǵy kóppáterli úılerge zaqym tıgen.
- Jergilikti turǵyndar Ertis mańyna tolyp alyp, qalaı jarylatyndyǵyn tamashalamaq boldy,-dedi Ermak Sálimov,-biraq, TJ qyzmetkerleri men polısııa olardy taratýǵa tyrysty. О́ıtkeni muzdyń oıylǵan bóliginiń astynda qalýy múmkin edi. Adamdar aman-esen, biraq, úıleriniń terezeleri synyp ketti. Qazir kelgen shyǵyndy anyqtaý úshin komıssııa jumys istep jatyr. Barlyq shyǵyndar óteledi.
Raýshan Nuǵmanbekova,
sýretter avtordyki.
Semeı