Halyqty áleýmettik qorǵaý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizilip, elimizde qoǵamnyń ártúrli toptaryna memleket tarapynan taǵaıyndalatyn járdemaqylardy tóleý tártibi ózgergen bolatyn. Bul ózgerister múgedektikti taǵaıyndaý máselesine de qatysty. Eńbek jáne halyqty áleýmettik qorǵaý vıse-mınıstri Svetlana Jaqypova Batys Qazaqstan oblysynda tájirıbeden ótkizilip jatqan osy jobanyń barysymen tanysty.
Buryn naýqastar múgedektik alýy úshin aýrýhanada aılap jatyp, emhanada tekserilip, san túrli qujat jınap, sodan keıin ǵana medısınalyq-áleýmettik saraptamadan ótip, múgedektik týraly qujatyn ala alatyn. Jańa joba boıynsha bul tártip ózgerdi. Endi múgedektik naýqastyń qatysýynsyz, qujattardy saraptaý arqyly syrtynan taǵaıyndalady. Bul syrqatqa qatysty barlyq medısınalyq qujat elektrondy formaǵa túsip, naýqastyń elektrondy ambýlatorııalyq kartasy paıda bolǵan kezde op-ońaı júzege asady eken. Iаǵnı múgedektikti taǵaıyndaıtyn táýelsiz sarapshylar elektrondy kórsetkishterdi saraptaý arqyly sheshim qabyldaıdy. Bul qujattarda naýqastyń aty-jóni kórsetilmeıtindikten, sarapshylar tipti kimge múgedektik taǵaıyndap otyrǵandaryn da bilmeıdi eken.
Sońǵy kezde óńirde densaýlyq saqtaý salasyn aqparattandyrý isi jedel júrýde. Oblystyq densaýlyq saqtaý basqarmasynyń basshysy Qanat Tósekbaevtyń aıtýynsha, óńirdiń medısınalyq uıymdarynda «Kazmedinform» medısınalyq aqparattyq júıesi, qalanyń 6 emhanasynda elektrondy kezekti basqarý júıesi, jedel medısınalyq járdemdi basqarýdyń «ADIS» avtomattandyrylǵan júıesi engizilgen. Munyń bári joǵaryda aıtylǵan múgedektikti taǵaıyndaý jónindegi qanatqaqty jobany synap kórýge tolyq múmkindik beredi.
S.Jaqypova Oraldaǵy №3 emhananyń jumysymen tanysqan soń, medısınalyq aqparattyq júıe boıynsha óńirler arasynda Batys Qazaqstan oblysynyń kóshbasshy ekendigin aıtyp ótti. Mine, sondyqtan da atalǵan qanatqaqty joba birinshi bolyp Aq Jaıyq óńirinde iske qosylady.
Qazbek QUTTYMURATULY,
«Egemen Qazaqstan»
Batys Qazaqstan oblysy