Oral qalasyna qarasty Derkól kentiniń «Kókjıek» shaǵyn aýdanynda jańadan ashylǵan mektep ǵımaraty paıdalanýǵa berildi. Mektep 600 oqýshyǵa arnalǵan.
– Elbasynyń «Nurly jol» baǵdarlamasymen salynǵan jańa mektep – kópten kútken qýanysh. Bul jyl basynan beri paıdalanýǵa berilgen ekinshi mektep. Aldaǵy ýaqytta tek oblys ortalyǵynda emes, Bókeı Ordasy, Zelenov, Aqjaıyq, Terekti aýdandarynda mektepter salamyz. Elbasy bilim salasyna erekshe kóńil bólip keledi. Oblys boıynsha bul saladaǵy bıýdjet sońǵy úsh jylda 20 mlrd teńgege kóbeıdi. Muǵalimder jaǵdaıyna da Memleket basshysy basa nazar aýdarýda. Osy oraıda jańa formatqa oqýǵa kóshken muǵalimderdiń jalaqysy kóbeıetin bolady. Oǵan qazir respýblıkadan tıisti qarajat kútip otyrmyz, – dedi saltanatty ashylý jıynyna qatysqan oblys ákimi Altaı Kólginov.
Sońǵy jyldary kóship kelýshilerdiń, tegin jer úlesin alýshylardyń esebinen Oral qalasynyń etek-jeńi dalıyp barady. «Kókjıek» shaǵyn aýdany da sońǵy kezde paıda bolǵan. Sý, kógildir otyn sekildi jeliler tartylyp, joly salynyp jatqan jańa aýdannyń balalary osy kezge deıin kórshiles Seleksıonnyı kentindegi №12 mektepke qatynap oqıtyn. Ol mektep ǵımaratynda da oryn bolmaı, oqýshylar kóp qıyndyq kórdi. Endi, mine, jańa aýdannyń óz mektebi bar. Jalpy aýmaǵy 8,5 myń sharshy metr mektep ǵımaratynda 56 oqý kabıneti, kitaphana, 2 sheberhana, barlyq quraldarymen jabdyqtalǵan sport zaly, 200 oryndyq májilis zaly, radıotorap kabıneti, 130 orynǵa arnalǵan mektep ashanasy bar. Barlyq kabınet proektilik ekranmen jabdyqtalǵan. Jańa mektepke 500 oqýshy, shaǵyn ortalyqqa 100 oqýshy qabyldanbaq.
Qurylysy 2016 jyldyń qarasha aıynda bastalǵan mektep ǵımaratyn salýǵa «Nurly jol» baǵdarlamasy aıasynda 1 255,609 mln teńge qarjy jumsalǵan.
Qazbek QUTTYMURATULY,
«Egemen Qazaqstan»
Batys Qazaqstan oblysy