«Qyzyljar-SQ» fýtbol komandasy toǵyz jylǵy úzilisten keıin byltyr el chempıonatynyń Premer-lıgasyna oraldy.
Jasyratyny joq, kemi alty aı boıy aq kórpesin aıqara jamylatyn teriskeıde jaýyndy-shashyndy jaz aılarynda da jergilikti aıaqdop sheberleriniń tyńǵylyqty jattyǵýlaryna kedergiler az kezdespeıtin. Bıyl qurylǵanyna jarty ǵasyr tolyp otyrǵan klýb jýyrda úlken qýanyshqa bólendi. «Jastar» stadıonynda aýmaǵy eki myń sharshy metrdi quraıtyn jabyq fýtbol maneji paıdalanýǵa berildi.
Nysannyń ashylý saltanatyna aımaq basshysy Qumar Aqsaqalov qatysyp, turǵyndar arasynda salamatty ómir saltyn nyǵaıtyp, sporttyń buqaralyǵyn arttyrýda sport ınfraqurylymdaryn kóptep salýdyń mańyzdylyǵyn atap ótti.
Fýtbol ortalyǵynyń jetekshisi Vıacheslav Kolodanyń aıtýyna qaraǵanda, halyqaralyq talaptarǵa saı turǵyzylǵan jabyq manejde 200-ge jýyq jas fýtbolshylar da, jeńil atletshiler de jattyǵa alady. Olardy 14 bapker shyńdaıdy.
Byltyr oblys ortalyǵyndaǵy kópqabatty úılerdiń aýlalary men mektepter janynda 9 shaǵyn fýtbol alańy boı kótergen bolatyn.
Shalǵaıdaǵy sport kesheniÝálıhanov aýdanynda bes myńǵa jýyq adam sportpen júıeli túrde aınalysady. Bul maqsat úshin 146 sport nysany jumys isteıdi. Jýyrda munda deneshynyqtyrý-saýyqtyrý kesheni iske qosyldy. Onyń ashylýyna qatysqan deneshynyqtyrý jáne sport basqarmasynyń basshysy Rýslan Esenalın aımaq basshysy atynan 400 myń teńgeniń sertıfıkaty men boksqa arnalǵan rıngti tartý etti. Aýdan ákimi Medet Ospanov 33 úıirmege 400-den astam jetkinshektiń tartylǵanyn, erejesiz jekpe-jek seksııasy qurylǵanyn, arnaıy maman baspanamen qamtamasyz etilgenin jetkizdi.
1,5 myń sharshy metr aýmaqty alyp jatqan keshenniń qurylysyna oblystyq qazynadan 183 mıllıon teńge jumsaldy. Onyń birinshi qabatynda fýtbol, voleıbol, kúres, bokspen aınalysýǵa, ekinshi qabatynda shahmat, doıby, toǵyzqumalaq oınaýǵa barlyq jaǵdaı jasalǵan. Dýsh, saýna jumys isteıdi.
Almaty qalasynda «Clinik Dr. Vovk» ortalyǵyna jetekshilik etetin Vıktor Vovk ta qýanyshqa ortaqtasyp, syı-sııapat jasady. Ol jerlesterine júıeli túrde qarjylyq qoldaý kórsetip turady. Fýtbol alańyn ashýǵa, qural-jabdyqtar alýǵa járdemdesti. Jas hokkeıshilerge 2 mıllıon teńgeniń kıimderin satyp áperdi. Birqatar týrnırlerdi uıymdastyrýǵa uıytqy boldy.
Túrli baıraqty básekelerde top jaryp júrgen saıypqyran sportshylar aýdanda az emes. Solardyń biri erkin kúresten sport sheberligine úmitker Sanat Qaıyrgeldın Mınsk qalasynda oqýshylar arasynda ótken jarysta júldeli úshinshi oryndy ıelenip, Túrkııada uıymdastyrylatyn birinshilikke ázirlenýde. Buǵan deıin kolledjde daıyndalyp kelgen edik. Jańa zalda sheberligimizdi jetildire túsetin bolamyz, deıdi bolashaǵynan úlken úmit kúttiretin balǵyn balýan.
Paralımpıadashylar marapattaldyOńtústik Koreıanyń Phenchhan qalasynda ótken HII qysqy paralımpıada oıyndarynda elimizdiń namysyn alty sportshy qorǵasa, úsheýi Qyzyljar óńirinen boldy. Olardyń arasynda Aleksandr Gerlıs shańǵy jarysynan tórtinshi orynǵa turaqtap, Qazaqstan komandasynyń jalpy esepte 20-orynǵa ornyǵýyna úlken úles qosty.
Jerlesterimiz talaı álemdik jarystarda Qazaqstannyń ataǵyn shartarapqa tanytyp júr. Al múgedek sportshylardyń jetistikteri úlken erlikpen parapar, dedi oblys ákimi Qumar Aqsaqalov paralımpıadashylardy arnaıy qabyldaǵan jıynda.
Bıatlon jáne shańǵydan halyqaralyq dárejedegi sport sheberi Aleksandr Gerlıske qurmet gramotasy men 1 mıllıon teńgeniń sertıfıkaty tabys etildi. О́zge sportshylar jarty mıllıon teńge mólsherinde syıaqyǵa, jattyqtyrýshylar alǵys hat pen aqshalaı syılyqqa ıe boldy.
Joǵary sanattaǵy bapkerler Marııa jáne Ivan Drobıazkolar óńirimizde múgedekter sportynyń damýyna aıtarlyqtaı eńbek sińirip keledi.
О́mir ESQALI,
«Egemen Qazaqstan»
Soltústik Qazaqstan oblysy