«Rýhanııat»

Seısenbi kúni saılaýaldy dodaǵa «Rýhanııat» partııasy da ilesip, kezekten tys VIII sezin ótkizdi. Jıyndy partııa tóraǵasy Serikjan Mámbetalın ashyp, sezge Qazaqstannyń 14 oblysy men Astana jáne Almaty qalalarynan 203 delegat qatysyp otyrǵandyǵyn málimdedi. Bul partııanyń basty jańalyǵy – tirkelmegen «Halyq rýhy» partııasymen birikkendigi. Endigi jerde Parlament Májilisi men máslı­hattar saılaýyna «Rýhanııat» partııasy men tirkelmegen «Halyq rýhy» partııasy úmitkerlerdi birlesip usynbaq. Keshegige deıin jetekshileri Altynshash Jaǵanova bolyp kelgen partııanyń «Rýhanııat» ja­syl­dar partııasy degen de ataýy bar. Sonymen, segizinshi sezdiń tóraǵasy bolyp saılanǵan kompozıtor Qaldybek Qurmanáli jıynda Qazaqstan Respýblıkasynyń 2002 jylǵy 15 shildedegi jáne basqa da zańdarymen engizilgen ózgeristerge súıenip, tirkelmegen «Halyq rýhy» partııasymen qosylǵaly otyrǵandyqtaryn aıtyp, sózdi osy par­tııanyń tóraǵasy Muhtar Shahanovqa berdi. Qoǵamymyzdyń búgingi jaı-kúıin saralaı kele, ári bizge senim bildirgen «Halyq rýhy» partııasy músheleriniń bizdi saıası kúres naýqanyna shaqyrǵan talap-tilekterine oraı jáne partııanyń Ortalyq keńesi tóral­qasynyń sheshimimen «Rýhanııat» par­tııasyna qo­sylǵandy jón kórdik. Ras, bizge res­pýblıka­myzdaǵy ózge de saıası par­tııalardan Parlament saılaýy naýqanyna baıla­nysty birlese kúresý týraly usynystar tústi. Alaıda, biz aqyldasa kele, «Rýhanııat» partııasyna toqtal­dyq, dedi Muh­tar Shahanov. Onyń aıtýynsha, «Rýhanııat» par­tııasynyń tizgini Serikjan Mámbetalınniń qolyna ótkeli beri bul partııa jańa baǵyt ustana bastaǵan. Osydan keıin Serikjan Mámbetalın eki partııa­nyń qosylýyna baılanysty týyndaıtyn zańdyq kedergiler týraly Shahanovtyń aıtyp ótkenin, soǵan oraı «Rýhanııat» partııasynyń Jarǵysyna ózgeris engizilgenin atap kórsetti. Men ózderińizdiń súıikti aqyndaryńyz Muhtar Shahanovty «Rýhanııat» par­tııasynyń qoǵam­dyq kóshbasshysy jáne rýhanı lıderi etip saılaýdy usynamyn, dedi Mámbetalın. Bul usynys ta daýysqa túsip, partııa músheleri tanymal aqyndy biraýyzdan ózderiniń jetekshisi dep qa­byldady. Jańa kóshbasshylaryn tórge ozdyrǵan partııa odan ári Parlament Májilisi saılaýyna oraı, saılaýaldy baǵdarla­masyn qabyldady. Baǵdarla­mamen partııa múshesi, belgili ǵalym Januzaq Ákim tanystyryp shyqty. Partııanyń saılaýaldy baǵdarlamasy bekitilgennen keıin, quryltaıshylar kún tártibi boıynsha, Májilis depýtattyǵyna kandıdattar tizimin jarııa­lady. 35 adam Parlament Májilisiniń depýtattyǵyna kandıdat retinde usynyldy. «Rýhanııat» partııasy ózderi usynǵan kandı­dattardyń barlyǵy derlik joǵary bilimdi, saıasattan habary bar, kózi ashyq adamdar ekendigin alǵa tartty. Aınash ESALI, Almaty.