«Árkim óz saıası alańynda júrýi kerek»

Keshe Astanada Qazaqstan Kommýnıstik halyq­tyq partııasynyń hatshylary Vladıslav Kosarev pen Jambyl Ahmetbekov jýrnalısterge baspasóz máslıhatyn ótkizdi. Baspasóz máslıhatyn ótkizýdegi maqsatymyz mynaý – bizdiń saılaýaldy tuǵyrnamamyzdyń alǵash­qy nusqasy partııa sezi bekitpeı jatyp-aq, buqa­ralyq aqparat quraldarynda jarııa etilipti. Árıne, muny biz jaman dep otyr­ǵanymyz joq. Sebebi, keıbir azamattar tuǵyr­namamen tanysqan da bolar. Alaıda, bul saı­laý­aldy baǵdarlama basylymdarda basylyp, ár jerde, keıbir partııa arasynda talqyǵa túsip jatqanǵa uqsaıdy. Biz mundaı áńgimelerdi tizgindegimiz keledi. Sebebi, mundaı áreket­terdi Ortalyq saılaý komıssııasy, ıa bolmasa bılik úgit-nasıhat jumysy dep baǵalaýy múmkin. Osy oraıda mynany málim­deımiz: biz saı­laýaldy tuǵyrnamamyz ben baǵdar­lamamyzdy ádeıi taratqan joqpyz. Bul tuǵyr­namany bizdiń partııa atynan de­pý­tattyqqa túsetin kandıdattar úshin úgit-nasıhat jumystary bastalǵan kezde ǵana taratatyn bolamyz, dedi V. Kosarev. Biz qazirgi qoǵamnyń túıtkildi saýaldaryna qara­paıym adamdardyń muń-muqtajyn eskere otyryp jaýap izdeýge umtyldyq. Biraq, basqa azamattar da, saıası partııalar da saılaýshylardyń usynystaryn eskere otyryp, ózderiniń saılaýaldy tuǵyrnamasynda biz kóterip otyrǵan máselelerge uqsas ıdeıalardy alǵa tartqan. Máselen, áleýmettik salaǵa qatysty. Son­dyqtan, saıası partııalar ózara kelisip, ózderiniń saıası ustanymdaryn aıqyndap alýy kerek. Árkim óz alańyn aıqyndap, sol jerde jumys isteýi tıis. Máselen, biz áleýmettik sala boıynsha jumys atqaryp kelemiz. Bolashaqta da osy alańda jumys atqarǵymyz keledi, sol sebepti ózgelerdiń bizdiń alańǵa bas suǵyp, bizdiń máselelerimizge aralasýlaryn qalamaımyz. Bul rette, qandaı da bir partııanyń atyn atap, túsin tústegendi jón kórmeımiz. Biz tek eskertemiz, dedi V.Kosarev. Al QKHP hatshysy Jambyl Ahmetbekov bizdiń Kommýnıstik halyqtyq partııa óziniń tuǵyrna­ma­synda eń aldymen áleýmettik máse­lelerdi nazarda ustaǵysy keledi. Bul rette, ózge partııalar da ózderiniń burynnan kele jatqan ıdeıala­rynda turyp, ózgeniń alańyna aýyspasa eken deımiz. Sebebi, áleýmettik máselelerdi sheshý – olardyń túpkilikti kózdegen maqsaty emes. Bul – tek saılaý aldyndaǵy upaı jınaýdyń bir kórinisi, dedi. Jýrnalısterdiń: «Sizderdiń partııalaryńyz alda­ǵy Parlament Májilisi saılaýynda qansha daýysqa ıe bolady dep oılaısyzdar?» degen saýalyna V.Kosarev: «Eger ondaı múmkindik bolsa, ózim de bireýden surap alar edim. Biraq, burynǵy saılaýlarmen salystyr­ǵanda joǵary daýys jınaımyz ǵoı dep oılaımyz. Bizdiń kózdegen maqsatymyz da osy. Partııadan saı­laýǵa usynylǵan 23 azamattyń árqaısysy depýtat­tyqqa laı­yq. Arasynda 3 ǵylym doktory, 6 jumys­shy, 6 áıel azamatsha, 4 kásipker bar. Sezde olardyń kandıda­týrala­ryn eshbir kedergisiz bekittik», dep jaýap berdi. Láıla EDILQYZY.