Mańǵystaý oblysynda memlekettik kirister departamentiniń «Aqtaý qalasynyń atqarýshy bıliginiń geoaqparattyq kartasyn tanystyrý» men «Astana-1 aqparattyq júıesiniń 3-kezeńiniń iske qosylýyn tanystyrý» boıynsha jınalysy ótti.
Memleket basshysynyń «Tórtinshi ındýstrıaldy revolıýsııa jaǵdaıynda damýdyń jańa múmkindikteri» atty Qazaqstan halqyna Joldaýy, sondaı-aq «Bes áleýmettik bastamalary» birqatar tapsyrmalardy alǵa qoıdy. Atalmysh nusqaýlardy oryndaý qarjylyq qoldaýdy talap etedi. Osyǵan baılanysty memlekettik kiris organdaryna jergilikti bıýdjettiń kiristerin tolyqtyrý mindeti qoıylǵan.
Aqtaý qalasynyń geoaqparattyq kartasy memlekettik qala qurylysy kadastrynyń jáne salyq organdarynyń júıelerin biriktirý úshin qurylady. Sol arqyly salyq tóleýshilerdiń qyzmetin baqylap, salyq túsimderin arttyrýǵa múmkindik beredi.
-Qazirgi tańda oblystyń barlyq deńgeıinen túsetin túsimder 180 mlrd. teńgeni quraıdy, bul ótken jyldyń sáıkes kezeńimen salystyrǵanda 54,5 mlrd. teńgege artyq. Buǵan deıin bıýdjettiń kiris bóligin iske asyrýdyń nátıjeleri boıynsha biz respýblıka reıtıngisinde sońǵy orynda tursaq, aǵymdaǵy jyldyń 1-toqsanynyń aıaǵynda 1-orynǵa jaıǵastyq.
Aǵymdaǵy jyldyń birinshi toqsanyndaǵy bıýdjet túsiminiń ósý qarqyny 16 paıyzdy qurady, bul ótken jylmen salystyrǵanda 13,4 mıllıard teńgege artyq. Mundaı dınamıka bıylǵa josparlanǵan boljamdy oryndaýǵa ǵana emes, ony asyra oryndaıtynyna senimdimin. Memlekettik kiris basqarmasy bul jumysty qamtamasyz etýi kerek, dedi oblys ákimi Eraly Toǵjanov.
Dúnıejúzilik saýda uıymynyń normalaryna jáne halyqaralyq standarttarǵa sáıkes, aǵymdaǵy jyldyń 1 sáýirinde elimizdiń barlyq aýmaǵynda «Astana-1» elektrondyq kedendik deklarasııalaýdyń aqparattyq júıesi engizildi, bul Memleket basshysynyń ekonomıkalyq sektorlardy sıfrlandyrý boıynsha aǵymdaǵy saıasatynyń elementteriniń biri.
2017 jyldyń 1 qazanynan bastap «Astana-1» júıesiniń birinshi komponenti Qazaqstan Respýblıkasynyń aýmaǵynda iske qosyldy.
Endi tranzıttik deklarasııa berýdiń ortasha ýaqyty 4-7 mınýtty quraıdy. Bul burynǵyǵa qaraǵanda segiz ese jyldam. Aǵymdaǵy jyldyń 3 qańtarynda «Astana-1» AJ «Taýarlar eksporty» kedendik rásimimen iske qosyldy. Eger buryn tirkelý kezinde shamamen 2 saǵat jumsalsa, qazir tirkeý ýaqyty 3-5 sekýndtan aspaıdy, bul EAEO kedendik aýmaǵynan taýarlardy eksporttaý prosesin 97% -ǵa jedeldetti.
-«Astana-1» aqparattyq júıesiniń úshinshi kezeńine kirý avtomatty túrde tirkelýge ǵana emes, sondaı-aq «jasyl» dálizde deklarasııa shyǵarýǵa da múmkindik beredi, bul kedendik ister departamenti men kedendik rásimdeý mamany arasyndaǵy tikeleı baılanysty boldyrmaýǵa múmkindik beredi. Jasyl dáliz boıyndaǵy taýarlarǵa deklarasııalardy óńdeý jáne shyǵarý ýaqyty 1 mınýttan aspaıdy. Buryn mundaı rásimder 50 mınýtqa deıin sozylatyn», - dedi Memlekettik kirister Departamentiniń basshysy Álibek Tilegenov.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy