Meniń sanaly ǵumyrymnyń biraz bóligi memlekettik basqarý organdarynda ótti. Oblystyq atqarý komıtetiniń tóraǵasy bolǵan kezimde munaıly Atyraýdyń ár salasyn, ár aýdany men ár aýylyn damytý, órkendetý úshin eńbektendik. Joǵarǵy Keńeske depýtat bolyp saılanǵanda da óńirdiń problemasyna Úkimettiń, tıisti mınıstrlikterdiń nazaryn aýdarýǵa týra keldi. О́ńirdiń órkendeýine qatysty keıbir máselelermen Mınıstrler Keńesiniń Tóraǵasy Nursultan Nazarbaevpen de ortaq múdde turǵysynda pikirles bolyp edik. Ol sol kezdiń ózinde ár oblystyń problemalaryn jetik biletinin ańǵartýshy edi. Jas jigittiń janaryndaǵy jalyndaǵan otty, elge, týǵan jerge janashyrlyǵyn, otanshyldyq sezimin kórip, qyzmetine syrttaı tileýlestik tanytyp júrdik.
Al, 1991 jyly 1 jeltoqsanda elimizde alǵash ret Prezıdent saılaýy ótkizildi. Bul – bizdiń elimizdegi memleket basshysyna senim bildirgen eń tuńǵysh saılaý. Sol sebepten de ár kimniń oıynda memlekettiń tizginin eldiń keleshegin oılaıtyn, ulttyq múddeni kózdeıtin basshyǵa tapsyrsaq degen úmit oty oıandy. Respýblıka halqy sol sátte elge tutqa bolatyn birden-bir úmitker Nursultan Nazarbaev dep tanydy. Sol kúngi saılaýda daýys berýge asyqqan jurttyń kóptigin áli umytqan joqpyn. Men de alǵashqylardyń qatarynda saılaý ýchaskesine erteletip baryp, óz daýsymdy Nursultan Ábishulyna bergen edim. Men sekildi oǵan senim bildirgender de kóp edi. Eldiń bul tańdaýy óziniń jemisin berdi.
Menińshe, Elbasyna senim bildirgen sol saılaý el táýelsizdigine jol ashqan aqjoltaı saılaý bolatyn. Olaı deıtinim, sol saılaýdan soń týra 15 kún ótkende elimiz derbestigin alyp, táýelsiz Qazaqstan atandy. Biraq eldiń turalaǵan salalaryna eńse tiktetý ońaı emes edi. Osynaý qıyn kezeńde eli sengen Elbasy Nursultan Nazarbaev reformalardy jedel engizip, shetelden ınvestısııa tartýǵa qadam jasady. О́zine senim bildirgen halyqtyń úmitin aqtaýǵa umtyldy. Sodan bergi 20 jylda Qazaqstan álemdegi qýatty elderdiń qataryna endi. Ekonomıkanyń ár salasy saýyqty, aýyldarymyz eńse tiktedi. Turmys túzeldi. Sheteldiktermen básekeles bolatyn úzdik mamandarymyzdyń shoǵyry qalyptasty.
Qazir Qazaqstandy jahan jurty tanıdy, jaýhardaı jaınaǵan elordamyz – Astanaǵa qyzyǵyp, ári qyzǵanyp qaraıdy. Údemeli ındýstrııalyq-ınnovasııalyq jobalar iske asyp jatyr. Bir sózben aıtqanda, táýelsiz Qazaqstannyń ekonomıkasy órkendedi, qazaqtyń órkeni ósti. Elge qut darydy, berekemiz tasydy. Osynyń bári Elbasynyń eren eńbeginiń jemisi! Alda da osy baǵyttan taımaı, birligimiz nyǵaıyp, Qazaqstanymyzdyń qýaty arta bersin!
Esen TASQYNBAEV, memleket jáne qoǵam qaıratkeri, Atyraý oblysynyń qurmetti azamaty.
Atyraý.