Jambyl oblysy tarıhı-mádenı nysandarǵa baı ólkeniń biri. Ejelgi Taraz tarıhynyń ózi adamzat tarıhymen astas rýhanı qundylyq. Búgingi tańda óńirdiń áleýetin arttyrý, ekonomıkasyn kóterý, otandyq týrızmdi damytý maqsatynda kóne Áýlıeata aımaǵyn týrıstik ortalyqqa aınaldyrý jumystary qolǵa alynýda.
Osy oraıda Taraz qalasynda Elbasy Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýyn iske asyrý aıasyndaǵy týrızmdi damytý máseleleri boıynsha Qazaqstan Respýblıkasy Mádenıet jáne sport mınıstrliginiń uıymdastyrýymen Jambyl oblysy aýmaǵynda ornalasqan «Ejelgi Taraz eskertkishteri» qoryq-mýzeıine qarasty «Aqyrtas» kesheninde respýblıkalyq buqaralyq aqparat quraldary ókilderine arnalǵan baspasóz konferensııasy ótti.
Konferensııanyń maqsaty – elimizdegi týrızmdi damytý, tarıhı, kıeli eskertkishterdi zertteý jáne nasıhattaý. Mınıstr Arystanbek Muhamedıuly tóraǵalyq etken konferensııa jumysyna Jambyl oblysynyń ákimi Asqar Myrzahmetov, «Qazaqstan Temir joly» Ulttyq kompanııasy» AQ-nyń ókilderi, elimizge tanymal ǵalymdar men respýblıkalyq buqaralyq aqparat quraldarynyń basshylary qatysty.
Jıyn barysynda IýNESKO-nyń Búkilálemdik muralar tizimine jáne Qazaqstannyń jalpyulttyq mańyzy bar kıeli jerleriniń tizimine engen «Aqyrtas» keshenin jáne Jambyl óńirindegi ózge de tarıhı nysandardy týrıstik ortalyqqa aınaldyrý máselesi talqylandy. Jalpy, bir jarym ǵasyrǵa jýyq ýaqyt bederinde «Aqyrtas» kesheni zerttelip keledi. Endi atalǵan keshendi ózimiz tanyp qana qoımaı, ózgelerge de tanytý maqsatynda keshen aýmaǵyn týrıstik ortalyqqa aınaldyrý máselesi kún tártibinde tur. Osy maqsatta Qazaqstan Respýblıkasy Mádenıet jáne sport mınıstrligi, Jambyl oblysynyń ákimdigi jáne «Qazaqstan Temir joly» Ulttyq kompanııasy» AQ úshjaqty memorandýmǵa qol qoıdy.
Sonymen qatar «Aqyrtas» kesheniniń Sapar ortalyǵynda «Ejelgi Taraz eskertkishteri» qoryq-mýzeıiniń jyljymaly «Rýhanı jańǵyrýǵa 1 jyl» atty kórmesi ótip, kórmege oblys aýmaǵyndaǵy tarıhı oryndarda júrgizilgen arheologııalyq qazba jumystary barysynda tabylǵan jádigerler qoıyldy.
Hamıt Esaman,
«Egemen Qazaqstan»
Jambyl oblysy