Horvatııanyń Varajdın qalasynda ótip jatqan tennısten «Devıs kýbogynyń» shırek fınaldyq kezdesýinde Qazaqstan quramasy kort ıeleriniń júıkesin ábden juqartty. Álemdik tennıste kóshbasshy qatarda júretin shaqpaq jeıdeliler Qazaqstan quramasy tarazy basyn teńestirgende tyqyrshyp tynyshy kete bastady.
Al jalpy teke tirestegi alǵashqy matchty ataqty Marın Chılıch pen Dmıtrıı Popko bastady. Bul eki tennısshiniń deńgeıi jer men kókteı edi. Oıyn bastalmaı jatyp boljamshylar jeńisti horvat tennısshisi toılaıtynyn esh shúbásiz aıtty. Árıne, álemniń úshinshi raketkasy Marın Chılıch jas tennısshi Dmıtrıı Popkoǵa kójek kórgen qasqyrdaı atyldy. Match bastalysymen joıqyn soqqylarymen birden qarsylasty tyqsyryp alǵysy kelgen Marınniń bul oıy iske aspady. Qazaqstandyq tennısshi Chılıchtiń aýyr soqqylaryna tótep berip, tipti reti kelgende shabýylǵa da shyqty. Biraq, bul jaǵdaı birinshi settiń 5 geımine deıin ǵana jalǵasty. Odan keıin bir breık jasap, qazaqstandyqtyń geıminde jeńiske jetken Marın, match tizginin óz qolyna aldy. Biriniń artynan birin eıster jasap geım artynan geım, set artynan set jeńdi. Nátıjesinde 6:2, 6:1, 6:2 esebimen Chılıch alǵashqy jeńisti tirkep, Horvatııa 1:0 esebimen alǵa ozdy.
Araǵa saǵat salyp kortqa Horvatııanyń taǵy bir myqty tennısshisi Borna Chorıch keldi. Onyń da oıy tek qana jeńis bolatyn. Qarsylasy Kýkýshkınde ketken esesi bar. Madrıdte ótip júrgen týrnırde 2 márte jeńilgen eken. Biraq, jas tennısshi odan beri buǵanasy qatyp, bilegi somdala túsken. 2018 jyldyń basynan beri 2-3 jarystyń jarytylaı fınalyna jetse kerek. «Tulpary ozǵan eldiń taıy da ozar» dep Chılıchtiń izin Chorıch jalǵaýy kerek dep horvat jankúıerleri alaqan soqty. Bastapqyda birinshi setti Borna 6:3 esebimen jeńdi. Biraq, odan keıingi setterde seniminen aıyrylyp, raketkasyn jerge uryp, óz-óziniń qutyn qashyrdy. Jas jigittiń jeligip ketkenin kórgen Kýkýshkın tájirıbıesiniń arqasynda Chorıchtiń álsiz tusyn qaıta-qaıta kózdeı berdi. Mıhaıldyń birde joǵary, birde tómen, tipti keıde qysqa tastaǵan doptarynyń barlyǵy upaıǵa aınala berdi. Qalǵan úsh setti ol 7:6, 6:4, 6:2 esebimen utty. Tarazy basy teńesip, alǵashqy jarys kúni Qazaqstan quramasy úshin sátti aıaqtaldy.
Ertesine jalǵyz ǵana oıyn josparlandy. Juptasý básekesinde bizdiń quramada Aleksandr Nedovesov pen Tımýr Habıbýllın óner kórsetti. Birinshi sette bul ekeýi Nıkola Mektıch pen Ivan Dodıgtiń degbirin qashyryp, korttyń túbine tyǵyp baqty. Úlken jyldamdyqpen bergen soqqylary alań ıelerin ábigerge salǵany ras. Taı-breıkte Nedovesov óz tájirıbıesine salyp, esepti 7:6 qyldy. Alaıda, Habıbýllınniń jastyǵy, mundaı iri qarsylastarǵa qarsy kóp oınamaǵandyǵy kóp áserin berdi. Qazaqstandyq jup qalǵan úsh sette jeńilip, upaıdy ýystan jiberdi. Kezdesý aıaqtalysymen Habıbýllın senimdi aqtaı almadym dep kózine jas aldy. Endi qalǵan eki kezdesýde Kýkýshkın men Popkonyń qalaı qımyldaryn kóremiz. Juptasýda jeńilgen soń, kelesi kezeńge ótý múmkindigimiz kúrt tómendep ketti.
Horvatııa – Qazaqstan tennıs matchyndaǵy esepti teńestirgen Mıhaıl Kýkýshkın tilshiler saýalyna jaýap berdi.
– Birden aıtaıyn, «Devıs kýbogynda» reıtıng degen eskerýsiz qalady. Borna Chorıch reıtıngte menen áldeqaıda bıik tur. Alaıda, bul – jeke syn emes, bul ulttyq qurama oıyny. Munda maǵan kómektesetin adamdar kóp. Búkil el bolyp jolyma qarap otyrǵanda, eshkimdi jerge qaratqym kelmedi. Osy oı meni búgin alǵa jeteledi.
– Jeńiske jetýge ne sebep boldy? Qarsylasyńyzdan kútkendeı kúsh kóre aldyńyz ba?
– Árıne, oıynnyń bastapqy bóliginde ol óte agressıvti oınady. Biraq, keıinnen qum tósenishine jyldam beıimdelmegenin baıqatyp aldy. Borna ekeýmiz bir-birimizdi jaqsy bilemiz. Onyń ústine osy oıynǵa AQSh-taǵy jarystan birge keldik. Ol jaqta hard tósenishte oınadyq. Al munda jaǵdaı basqasha. Kóbirek jattyǵyp, qol úıretip aldyq. Shamasy, qumǵa men jyldam úırenisken sekildimin. Onymen qosa ekinshi settegi taı-brektegi jeńisim maǵan psıhologııalyq jeńildik jasady. Odan keıin úshinshi settiń basynda tipti árbir urǵan soqqym upaıǵa aınalyp jatty.
Baspasóz máslıhatyna Mıhaıl Kýkýshkınmen birge Dıas Dosqaraev ta keldi.
– Ekinshi sette Mıhaıl bir geımde breık jasady, alaıda qaıtadan ózinikin berip qoıdy. Degenmen, bul oqıǵa ekinshi ret qaıtalanyp, qarsylasynyń geıminde jeńiske jetken kezde biz jeńiske sendik. Qarsylas ta shamamen sol tusta synyp qaldy ǵoı deımin.
– Birinshi settiń 8-geıminde qatarynan kóp qatelese bastaǵan Mıhaılge qandaı aqyl-keńes aıttyńyz?
– Birden baıqaǵanym, Mıhaıl qarsylastyń top-spın (shıirip tastaǵan soqqylar) soqqylaryn qaıtara almaı jatty. Odan keıin sol buryshqa qatarynan eki ret uryp, ońǵa qaraı bir márte ur degen sekildi aqyldarymdy der kezinde aıtyp otyrdym. Meniń negizgi jumysym sol edi. Korttyń túbine qaraı, ıaǵnı tordan keıinshektep baryp soqqylar jasaýyn suradym. Syrt kóz synshy ǵoı, Mıhaıl kórmegen qatelikterdi aıtyp turdym.
Ermuhamed MÁÝLEN,
«Egemen Qazaqstan»
Varajdın (Horvatııa)