«Egemendi Qazaqstannyń» 1991 jylǵy 3-12 jeltoqsan aralyǵyndaǵy nómirlerinen toptama.
Nursultan Nazarbaev – Qazaqstannyń halyq saılaǵan prezıdenti
Búkil halyq ony aq kıizge kóterip, Aq Ordaǵa otyrǵyzdy
«Egemen Qazaqstannyń» 1991 jylǵy 3 jeltoqsandaǵy nómiri osyndaı taqyryppen ashylǵan. Bul nómirde «Beldi býdyq! Táýekel dedik!» degen taqyryppen Nursultan Ábishuly Nazarbaevtyń ózin Qazaqstan halqy Prezıdent saılaǵannan keıin ótkizgen alǵashqy baspasóz konferensııasynan reportaj jáne «Prezıdentti osylaı saıladyq» degen taqyryppen Qazaqstannyń oblystary men qalalarynda saılaýdyń qalaı ótkendigi jóninde gazettiń menshikti tilshileriniń habarlary berilgen. Prezıdenttiń alǵashqy baspasóz konferensııasy Almatydaǵy dostyq úıinde uıymdastyrylǵan eken. «Osy jerde talaı jyly-júzdi kezdesý ótse de, búginginiń jóni bólek. Qazaq baspasózi, Qazaqstan jýrnalısteri, odaqtyq baspasózdiń Qazaqstanda tirkelgen ókilderi jáne shetel tilshileri bul joly Nursultan Ábishulyna suraq berýshi retinde emes, tileýqor retinde de keldi desek, ótirik aıtpaspyz. О́ıtkeni, Ortalyq saılaý komıssııasynyń tóraǵasy Qaper Bókenov: «Daýys berýge respýblıkadaǵy barlyq saılaýshylardyń 88,24 prosenti qatysty, daýys bergenderdiń 98,76 prosenti Nursultan Nazarbaevtyń kandıdatýrasyn jaqtady» dep málimdegende, qol soqpaǵan jýrnalıst joq. О́ziniń aqyldy saıasatymen tereń oılarymen jáne jeti ólshep, bir kesilgen sheshimderimen úlken bedelge ıe bolǵan Qazaqstan Prezıdenti – jýrnalısterdiń de qýana jolyǵatyn adamy. Vıse-prezıdent bolyp E.M.Asanbaev saılandy, onyń kandıdatýrasyn Memleket basshysynyń ózi usynǵan bolatyn» dep bastalypty tarıhı sátten syr shertken bul reportaj. Halyq saılaǵan Prezıdent óz sózinde qazaq halqyna, Qazaqstan halqyna, ózine tilektes bolǵan barlyq adamdarǵa, egemendi memleketterdiń baqylaýshylaryna, jýrnalıster qaýymyna raqmet aıtypty. Saılaý qorytyndysy ózine jaýapkershilik júkteıtinin, turǵyndardyń 99 prosentten astamy daýys bergen Temirtaý, Lenınsk sııaqty jaıshylyqta kez kelgen adamǵa daýys bere qoımaıtyn kúrdeli qalalardyń senimin rızalyqpen atap ótken. О́ziniń endi naryq qatynastaryna kóshýge, ekonomıkadaǵy jaǵdaıdy jóndeýge belsene kirisetinin málimdepti. «Egemendi Qazaqstan» gazetiniń tilshisi: «Halqyńyz Sizdi aq kıizge kóterip, Aq Ordaǵa qaıtadan otyrǵyzdy. Sizge aq jol tileımiz. Birinshi jarlyqty neden bastaısyz? Odan keıin Orta Azııa men Qazaqstan aımaǵynyń birligi úshin biraz áreket jasadyńyz. Osy tirshiliktiń jalǵasy qalaı bolady?» dep suraq qoıypty. Bul suraqqa Prezıdent: «Saılaýdyń sońyn kútpeı-aq birneshe Jarlyqtar ázirlegenmin. Solar jaryq kóredi. Eń aldymen, bıýdjetten jalaqy alatyn halyqtyń jaǵdaıyn oılaımyn. Solardyń jalaqysyn arttyrý jóninde jarlyq beriledi. О́ıtkeni, kásiporyndar erkin jalaqyǵa kóshken jaǵdaıda bıýdjettik mekemelerde qyzmet isteıtin qazaqstandyqtar naryq qyspaǵanda qalyp qoımaýy kerek. Orta Azııa respýblıkalarymen kezdesýler bolyp jatyr. Sońǵysy Tashkentte ótti. Túbi bir halyqtarmen baılanys nyǵaıady. Sondaı-aq musylman álemimen baılanys jaqsarady. Meni Arab elderi lıgasyna shaqyryp otyr» dep jaýap beripti.