Qostanaı qalasyn damytý máselelerine arnalǵan keńeske qatysqan ınvestor "BazisWest" kospanııasynyń atqarýshy dırektory Marat Jolmuhamedov Qostanaı qalasynda álemge áıgili alty qabattyq Ramada Encore jelisindegi qonaq úı salatynyn málim etti.
Qonaq úıde 163 bólme bolady. Alty qabattyq qonaqúıde meıramhana, fıtnes-zaly bolady. Qonaq úıdi ınvestor jergilikti bıliktiń kómek-qoldaýymen qalany tilip aǵatyn Tobyl ózeniniń jaǵajaıyna salatyn bolady. Onyń qurylysy bıyl bastalady.
«Ramada Encore qonaq úı jelisi álemge áıgili. Álemniń 63 elinde 800 qonaq úıi bar. Bizdiń kompanııa Qostanaıda qonaq úımen shektelip qalmaıdy, qalanyń ortalyǵynan zamanaýı stıldegi, zamanaýı qurylys materıaldaryn qoldanyp, 20 qabattyq turǵyn úıler salamyz. Sonymen birge «Bereke» dep atalatyn shaǵyn turǵyn aýdannan tórt qabattyq 28 úı salýdy da josparlap otyrmyz» dedi Marat Jolmuhamedov.
Investor kompanııa "BazisWest" Qostanaıdaǵy Indýstrııalyq aımaqtan sılıkat kirpish jáne temir-beton buıymdaryn shyǵyratyn zaýyt ta salatynyn habardar etti. Osynyń barlyǵyna ınvestor 10-15 mıllıard teńge shamasynda ınvestısııa salatyn bolady.
«Biz osyndaı ınvestordy kútken edik. Mundaı qonaq úı qalamyzǵa kerek-aq. Bizde qonaq úıler barshylyq. Biraq týrısterge oryn jete bermeıdi. Sondyqtan qalanyń bet beınesi bolatyndaı zamanaýı qurylystar kerek. Al 20 qabattyq úılerdi nege salmasqa? Qala kóldeneńinen emes, tiginen ósýi kerek. Jaıyla bergen qala aýyl bolady» dedi oblys ákimi Arhımed Muhambetov.
Názıra JÁRIMBET,
«Egemen Qazaqstan»
Qostanaı