Aqparat jáne kommýnıkasııalar mınıstri Dáýren Abaev halyqtyń sıfrlyq saýattylyǵyna baılanysty belgilengen eki baǵytty atady. Bul týraly ol Úkimet otyrysyndaǵy baıandamasynda málimdedi.
Búgingi Úkimet otyrysynda baıandama jasaǵan mınıstrdiń aıtýynsha, halyqtyń sıfrlyq saýattylyǵyn arttyrý boıynsha eki baǵyt belgilengen.
«Birinshisi - ortalyq memlekettik organdar halyq pen kásibı kadrlarǵa osy sala boıynsha jan-jaqty bilim beredi. Al ekinshi baǵyt boıynsha el turǵyndaryn jergilikti atqarýshy organdar oqytatyn bolady», - dedi Dáýren Abaev.
Birinshi baǵyttyń aıasynda Eńbek jáne halyqty áleýmettik qorǵaý, Densaýlyq saqtaý, Bilim jáne ǵylym, Aýyl sharýashylyǵy mınıstrlikteri jaýapty memlekettik organdar retinde qatysady. Atalǵan memlekettik organdar sıfrlyq saýattylyqqa baılanysty qosymsha bilim berýge atsalysady.
«Máselen, Ulttyq ekonomıka mınıstrligi «Bıznesti júrgizý» atty kásipkerlerdi aýqymdy oqytý jumystaryn júrgizip jatyr. Demek, osy oqytý baǵdarlamasyna sıfrlyq salany qosý josparlanǵan. Osyǵan uqsas tásildi pedagog kadrlar men taǵy basqa mamandardyń biliktiligin arttyrý kezinde paıdalaný kózdelgen. Oqytýǵa josparlanǵan kásibı mamandardyń sany - 385 myń adam. Sonymen qatar, 8 mıllıon azamatty memlekettik elektrondyq qyzmet alýǵa jáne onlaın-saýda júıesin ıgerý boıynsha bazalyq bilimge úıretý kózdelgen. Bul «Azamattarǵa arnalǵan úkimet» memlekettik korporasııasy men «Qazposhta» AQ bazasynda júzege asyrylady», - dedi Dáýren Abaev.
Mınıstrdiń baıandamasyna sáıkes, qazirgi tańda el turǵyndarynyń sıfrlyq saýattylyǵynyń bazalyq deńgeıi 77 paıyzdy quraıdy. Jyl sońyna deıin bul kórsetkishti 78,5 paıyzǵa jetkizý josparlanyp otyr.