Qorǵanys salasyna qajetti qurylǵylar otandyq kásiporyndarda shyǵarylatyndyqtan zamanaýı quraldardy shekarashylar kúndelikti qyzmetinde paıdalanyp júr.
UQK Shekara qyzmeti «Soltústik» óńirlik basqarmasy bastyǵynyń ýaqytsha mindetin atqarýshy Jánibek Tólebaevtyń aıtýynsha byltyr shekaradan esirtki zattaryn jasyryn jolmen alyp ótýdiń 126 oqıǵasy tirkelgen. 8,4 kılo esirtki tárkilenip, qarý-jaraqtardy zańsyz asyrýdyń 164 faktisi áshkerelengen. Qurylym Shyǵys Qazaqstan, Pavlodar, Qostanaı, Soltústik Qazaqstan oblystaryn qamtıdy. О́tken jyly áskerıler Reseımen shektesetin meklekettik shekara boıynda 3600-den astam zań buzýshylyqty anyqtaǵan. Bul kórsetkish 2016 jylmen salystyrǵanda 26 paıyzǵa kóp.
Desek te shekaralyq aımaqtarda sheshimin tabatyn máseleler joq emes. Búginde shekarashylar syrttan el aýmaǵyna kiretin júk vagondaryn tekserýge qaýqarsyz. Máselen Býlaevo, Mamlıýtka temirjol stansalarynda júk vagondaryn skanerleýden ótkizetin keshendi quraldar joq. Ony satyp alýǵa qarajat qolbaılaý. Eń arzany bir mıllıard teńge turady. Sonyń saldarynan kúnine 170 júk kóligi tekserýsiz ótedi. Shekarashylar jumys isteıtin ákimshilik ǵımarattar eskirgen. О́tkizý beketterinde tıisti ınfraqurylymdar jetispeıdi. Qys mezgilinde, jaýyndy-shashyndy kúnderi joldarmen júrý qıyn. Túıindi máselelerdi sheshýdiń is-jospary túzilip, tıisti oryndarǵa joldanǵanmen, qajetti qarajaty kózi naqtylanbaǵan.
О́zekti máselelerdiń biri – jyl ótken saıyn el shebin kúzetetinderdiń kemip bara jatqany. Kadr jetispeýshiliginen keden beketterinde qyzmet kórsetýdiń sapasy tómendep ketken. Kólik júrgizýshiler men júk tasýshylar shekara pýnktterinde uzaq turyp qalyp, altyn ýaqyttaryn bosqa joǵaltyp jatatyn jaıttar jıi kezdesedi. Kerisinshe, shekarashylardyń jumys júktemesi eki ese kóbeıgenine qaramastan jalaqy mólsheri sol kúıinde qalǵandyqtan qyzmetke kelýshiler az.
Áskerı oqý oryndaryna qoıylatyn basty talap Qazaqstannyń Qarýly Kúshterin joǵary bilikti áskerı qyzmetkerlermen jasaqtaýdy qamtamasyz etý bolyp tabylady. Ulttyq Ulan Petropavl áskerı ınstıtýtynda áskerı bilim berý júıesin jetildirýdiń, ofıser mamandaryn daıarlaýdyń naqty sharalary júrgizilip keledi. Bul talaptar men mindetter birqydyrý sheshilgenimen, qolbaılaý kedergiler de joq emes. Solardyń biri–qurylys nysandaryn salýǵa arnalǵan jobanyń áli kúnge deıin qarjylyq jaǵynan qoldaý tappaı kele jatqany. Olardyń ishinde ofıserlerge arnalǵan turǵyn úı kesheni de bar. Kitaphanada 140 myń kitaptar men oqýlyq quraldary bar bolǵanymen jartysynan astamy qazirgi talaptarǵa sáıkes kelmeıdi. Kýrsanttar S. Muqanov atyndaǵy ortalyq kitaphanada daıyndalýǵa májbúr.
Baspanamen qamtý, oqý ǵımarattaryn jóndeý, kadr, oqýlyq tapshylyǵy sekildi máseleler sheshimin tapsa, áskerı qurylymdardyń jumysy jandana túseri anyq.
О́mir Esqalı,
«Egemen Qazaqstan»
Soltústik Qazaqstan oblysy