Elbasynyń «Rýhanı jańǵyrý» baǵdarlamasy aıasynda Shyǵys Qazaqstan oblysynyń Jezkent kenti óńirine Semeıdegi oblystyq Abaı atyndaǵy ámbebap kitaphana ujymy arnaıy is saparmen baryp qaıtty.
Kitaphananyń sırek qoryndaǵy HH ǵasyrdyń basynda jaryq kórgen «Latyn qarpindegi basylymdar» kórmesi jezkenttik turǵyndardyń nazaryna usynylyp edi, birden olardyń qyzyǵýshylyǵyna ıe boldy.
-Kórmede kitaphanamyzdyń sırek qoryndaǵy 1929-1940 jyldardaǵy latyn grafıkasyndaǵy kitaptar men olardyń avtorlary týraly málimetter oryn aldy. Osyǵan baılanysty qyzyqty aqparattarmen turǵyndardy da tanystyryp óttik,-dedi Shyǵys Qazaqstan oblystyq Abaı atyndaǵy kitaphana dırektorynyń orynbasary Gúlmıra Fatıhqyzy.
Latyn qarpindegi sırek kitaptarda qazaq eliniń sol tarıhı kezeńdegi qoǵamdyq-saıası, áleýmettik ómirinen aqparat beretin ult zııalylarynyń zertteýleri, ǵylymı eńbekteri qamtylǵan. Ǵylym salalaryndaǵy ádebıetterge kelsek, Q.Basymulynyń, Q.Jubanovtyń, T.Shonanovtyń, U.Qulymbetovtyń, T.Arystanbekovtyń, A.Mametovtyń, A.Seıitovtyń, Á.Ermekovtyń, H.Esenbaıulynyń, M.Áýezovtyń eńbekterin oqýǵa bolady.
Sondaı-aq, kitaphana qyzmetkerleri shara qonaqtaryna latyn qarpindegi kitaptardy QR-kod arqyly ózderiniń smartfondary men planshetterine elektrondyq nusqasyn kóshirip alý joldaryn kórsetti. Jezkent turǵyndarynyń rızashylyǵyna ıe boldy. Kezińde muǵalim bolǵan zeınetker, bizdiń kitaphanamyzdyń baıyrǵy oqyrmandary Valentına Kýzmıchnına jáne Ekaterına Aleksandrovna osyndaı mándi de maǵynaly kitap kórmesi úshin rahmetterin aıtyp, aldaǵy ýaqytta da osyndaı kórmemen kelip turýlaryn ótindi. Osylaısha kitaphana ujymy Jezkent turǵyndarynyń rızashylyǵyna ıe bolyp qaıtty.
Raýshan Nuǵmanbekova,
Semeı