Armandaǵannyń, alǵa asqaq maqsattar qoıǵannyń eshqandaı aıyby joq. Osy oraıda aqtóbelik jıhangez Danat Álıevtiń Marsqa ushý múmkindigin izdestirip júrgenin de túsinistikpen qaraýǵa bolady. Ol eń aldymen álemniń eń keremet 100 eline baryp aralap kórýdi maqsat etken bolsa, qazirgi kúni bul josparynyń denin iske asyryp úlgerdi.
Búginde Eýropa men Azııada, Ońtústik jáne Soltústik Amerıkada, Afrıka men Antarktıdada Danattyń tabanynyń izderi qalǵan. Dúnıeniń tórt túpkirin aralaý úshin eń aldymen qarajat kerek. Aqtóbelik saıahatshy ony qaıdan alyp júr?
Buǵan ashyq jaýap bermese de Danat jol shyǵynyn jabýǵa jetetindeı bıznesi bar ekenin málimdedi. Keń úı men kottedjde turý nemese oǵan jıhazdar satyp alý, baǵasy joǵary sheteldik avtokólik aıdaý oıyna kirip te shyqpaıdy. Bar oı-maqsaty saıahattaý ǵana. Ár eldi bir birimen salystyra qaraý oǵan kádimgideı lázzat syılaıdy. Júzge tarta elge joly túsken kezde jıhangez: «Jaman el joq, jaman adamdar kezdesip qalady» degen tujyrymǵa kelipti. «Kedeı nemese baı el dep bólmeımin, ár eldiń ózine tán qyry men syry, qupııasy men ózgege uqsamaıtyn ereksheligi bolady. Osyǵan kózim jetti. Jalpy, saıahatshylyq adamnyń dúnıetanymy men kókjıegin keńeıtedi. Zerdesi men oı-órisin tolyqtyra túsedi», deıdi ol.
Sondaı-aq Danat Álıev shetelge shyǵarda eń qajetti is avıabıletterdi saıttar arqyly tıimdi baǵaǵa satyp alý jáne medısınalyq saqtandyrý anyqtamasyn rásimdeý dep esepteıdi. Bul rette ol sharttary óziniń kóńilinen shyǵatyn vıza-kartochka ashyp, medısınalyq saqtandyrý rásimdeýdi daǵdyǵa aınaldyrypty. Bir joly osy qapysyz qamdanýynyń paıdasy da tıipti. Iаǵnı Taılandta bolǵan kezinde otandasymyz tamaqtan ushynyp, asqazanyn teksertkeni úshin 200 dollar tólegen eken. Elge kelgen soń saqtandyrýshy bank onyń emge jumsaǵan aqshasyn tolyq ótep beripti. Aldyn ala bir jylǵa qurylǵan jospar boıynsha álem elderine attanatyn aqtóbelik jıhangez taıaýda Japonııa men Túrkııaǵa júrip ketýdi oılastyryp otyr. Múmkindik týyp jatsa, ol saıahatynyń sońǵy núktesin Mars planetasynda qoıǵandy jón kóredi.
Temir QUSAIYN, «Egemen Qazaqstan»
AQTО́BE