Stanımır Stoılov: Ázerbaıjan quramasyn beker tańdaǵan joqpyz

– Qazaqstan fýtbol federasııasy maýsym aıynda elordada Ázerbaıjan qura­masymen joldastyq match ótki­zetinin jarııalady. Ázer­baıjan quramasy ne sebepten tańdaldy? Qarsylas týraly aıtyp ótseńiz?

– Eń aldymen Qazaqstanǵa kelý úshin kelisim bergen Ázerbaıjan quramasyna alǵys aıtqym keledi. Ekinshiden, kelissózdi júrgizgen Qazaqstan fýtbol federasııasy úlken jumys atqardy. ÝEFA-nyń Ulttar Lıgasynyń alǵashqy oıyny elordada ótetin bolǵandyqtan, joldastyq kezdesýdi óz alańymyzda qabyldaýǵa sheshim qabyldadyq. Irikteý tobyndaǵy qarsylasymyz Grýzııamen oıyny uqsas Ázerbaıjandy tańdadyq. Sońǵy jyldary Ázerbaıjan quramasy jaqsy oıyn kórsetip júr. Komandany jattyqtyratyn Gýrban Gýrbanovtyń da bilikti bapker ekenin atap ótkim keledi. Ázerbaıjanda klýbtyq deńgeıdegi fýtbol kóterilip kele jatqanyn bilemiz. Bizdiń komandanyń daıyndyǵyn tekserýge jaqsy múmkindik bolmaq.

– Maýsym aıyndaǵy qar­sy­las belgili. Ulttyq quramanyń oqý-jattyǵý jıynyndaǵy jos­parymen bólisseńiz?

– 1-5 maýsym aralyǵynda Astana qalasynda oqý-jattyǵý jıynyna jınalamyz. Bizdiń mindetimiz – komandanyń oıyn úlgisin qalyptastyrý. Vengrııa jáne Bolgarııamen ótken matchtardaǵy oıyn úlgisin ári qaraı damyta túsý maqsatyn alǵa qoıamyz. Alǵashqy oqý-jattyǵý jıynyn jaqsy ótkizdik. Ár jıyn saıyn komandaǵa jańa lep qosyp otyrý qajet. Árıne ázirge úlken qadamdar jasaı almaımyz. Birtindep alǵa jyljyp otyrý kerek. Maýsym-shilde aılarynda fýtbolshylarǵa túsetin aýyrtpashylyqty bilemiz. Fýtbolshylar ishki birinshilik pen Eýrokýbok týrnırlerinde oınaıdy. Ulttyq qurama oıyn­shylaryna 4-5 kún demalýǵa ruqsat beremin. О́ıtkeni 2-2,5 aı boıy olarǵa túsetin salmaq kóp bolmaq. Eýrokýbokta oınaıtyn komandalardyń jaqsy nátıje kórsetýi biz úshin de mańyzdy. Toptyq kezeńge birneshe komanda joldama alsa, úlken jetistik bolmaq.

– Premer-lıganyń alty týry aıaqtaldy. Besinshi týrda «Astana» men «Qaırat» jolyqty. Ulttyq qurama fýtbolshylarynyń oıyny qalaı? Maýsymdaǵy jıynǵa shaqyrtý alýǵa úmitti jańa esimder bar ma?

– Ulttyq quramanyń match­tarynan keıin komandalar deńgeılerin kóterip, babyna kele bastady. «Astana» men «Qaırat» arasyndaǵy kezdesý óte tartys­ty ótti. Ulttyq quramanyń oıyn­shylary osy matchta jaqsy oıyn kórsetti. Maýsym aıyna deıin birneshe oıyndy qarap, or­taq tujyrymǵa kelemiz. Jańa esim­der shyǵyp jatsa, ulttyq qura­maǵa shaqyrtý alady.

– Áńgimeńizge rahmet.

Áńgimelesken Ermuhamed MÁÝLEN,

«Egemen Qazaqstan»