Astana qalasyndaǵy Ulttyq mýzeı shyǵarmashylyq adamdardyń eńbegin nasıhattaýǵa baǵyttalǵan «Qazaqstan zamanaýı óneri tarıhyndaǵy tulǵalar» jobasy aıasynda «Erkindik» qorymen birlesip, belgili óner qaıratkeri, tanymal músinshi Erkin Mergenovtiń týyndylaryna arnap «Erkin Mergenov. Ýaqytty seziný» atty kórme uıymdastyrdy.
Erkin Tilekuly – qazaq músindeý óneriniń modernıstik baǵytyn qalaǵan tulǵa. Shyǵarmalary Máskeýdegi Tretıakov galereıasynda, Á.Qasteev atyndaǵy Memlekettik beıneleý óneri mýzeıinde, AQSh, Germanııa sııaqty elderdiń kórkemsýret qorynyń kolleksııalarynda saqtalǵan. E.Mergenovtiń shyǵarmashylyq talanty jaıly reseılik ónertanýshy Iý.Korolev: «Bul adamnyń oılaý, seziný, túısiný qabiletiniń tereńdigi, zamanaýı qubylystardy ańǵara bilýi, tek has sheberlerge ǵana tán kóripkeldik daryny, ony álemdik deńgeıge kóterdi» dese, osydan birneshe jyl buryn AQSh-taǵy Stenford ýnıversıtetiniń doktory, slavıan tili jáne ádebıeti kafedrasynyń aǵa oqytýshysy N.Skakov, Mergenovtiń týyndylary: tarıh, din, fılosofııa, ádebıette sony shyǵarmalar jazýǵa yqpalyn tıgizdi, depti.
N.Gogol atyndaǵy Almaty kórkemsýret ýchılıshesi jáne V.Sýrıkov atyndaǵy Máskeý memlekettik kórkemsýret ınstıtýtynyń túlegi Erkin Mergenovtiń ár jyldary qolynan shyqqan ǵumyrly eńbekteri – «Neke», «Tań», «Sheńber», «Mahambet», «Sezimtaldyq», «Aǵash úni», «Kesh», «Jamal», «Sábı jyly», «Daladaǵy taltús», «Ekeý. Qozy Kórpesh-Baıan sulý», «Qýanysh», «Bóbekter jyly», «Báıterek daýsy», t.b músin-keskindemeleri rasynda qazaq beıneleý ónerindegi tyń baǵyt. Onda – dala mádenıeti, Shyǵys órkenıetiniń kompozısııasy kórinis tapqan.
Talantty músinshiniń basty qasıeti ol ǵalam tanyǵan músinshiler – Kremer, Barlah, Mansý, Djakomettı, Maıolıa, Roden sııaqty tarlandardyń týyndylaryna tereńinen boılaý arqyly, olardyń stıldik ereksheligi men realıstik kózqarasynan sabaq ala otyryp, óziniń baǵytyn qalyptastyra alýynda.
Úsh jyl buryn ómirden ótken shyǵarmashylyq ıesi Erkin Tilekulyn eske túsirý úrdisi boıynsha uıymdastyrylǵan shara kezinde sóz alǵan Ulttyq mýzeı dırektorynyń mindetin atqarýshy L.Kochetov, Mergenovtiń týyndylary ult mádenıetin shetelge tanytýdyń úlgisi dedi. Sonymen qatar jıynǵa músinshiniń uly Álibek Mergenov, ónertanýshy Kamıla Lı bastaǵan sýretshiler jáne basqa da tanymal tulǵalar qatysyp, arnaıy ótkizilgen konferensııa barysynda óz oılarymen bólisti.
Beken QAIRATULY,
«Egemen Qazaqstan»