«Sıfrly Qazaqstan» baǵdarlamasy aıasynda «Nur Otan» partııasy balalarǵa arnalǵan tegin IT-synyptar ashý jáne IT-mamandar daıarlaý isin qolǵa alyp otyr. Bul týraly Ortalyq kommýnıkasııalar qyzmetinde «Nur Otan» partııasy Rýhanı jańǵyrý aıasyndaǵy jańa jobalary týraly ótken baspasóz maslıhatynda aıtyldy.
«Balalarǵa arnalǵan tegin IT-synyptardyń kóterer júgi salmaqty bolmaq. Bul joba aıasynda elimiz boıynsha 1000 IT-synyp ashylyp, onda jylyna 8-16 jas aralyǵyndaǵy 150 myń bala baǵdarlamalaý jáne robot tehnıkasynyń negizderi jaıynda Eýropalyq bilim berý standarty negizinde tereńdetilgen bilim alady. Ázirge 2018-2020 jyldarǵa, ıaǵnı úsh jylǵa josparlanǵan bul joba boıynsha 450 myń balany oqytý kózdelip otyr. Bul bastama mektepterge fakýltatıvti pán retinde engizilip, úsh aılyq jáne alty aılyq kýrs retinde júrgiziledi», dep málimdedi «Nur Otan» partııasy tóraǵasynyń birinshi orynbasary Máýlen Áshimbaev.
Atalǵan joba aıasynda aldaǵy úsh jylda elimizde jumys berýshi IT-kompanııalar men iri joǵary oqý oryndarynyń bazasynda 20 IT-ortalyq ashylyp, jylyna 35 myń adam bilim almaq. Bul ortalyqtarda búginde álemdik deńgeıde suranysqa ıe sıfrlaý tásilderi men Java, Python, PHP, Swift sııaqty baǵdarlamalaý tilderi oqytylady.
«Ortalyq túlekterine bir jyl boıy qoldaý kórsetilip, olardyń jumysqa ornalasýyna da meılinshe jaǵdaı jasalady», dep atap ótti M. Áshimbaev.
Osylaısha, «Nur Otan» partııasy «Atameken» ulttyq kásipkerler palatasymen birlesip qazaqstandyqtardyń sıfrlyq saýattylyǵyn arttyryp qana qoımaı, olardyń álemdik iri jobalarǵa qatysatyn básekege qabiletti maman bolyp qalyptasýyna jaǵdaı jasamaq.